దేశీ స్టాక్‌ మార్కెట్లు నేడు సానుకూల ఓపెనింగ్‌ చాన్స్‌!

దేశీ స్టాక్‌ మార్కెట్లు నేడు కొంతమేర సానుకూలంగా ప్రారంభమయ్యే అవకాశముంది. ఇందుకు సంకేతంగా ప్రస్తుతం సింగపూర్(ఎస్‌జీఎక్స్) నిఫ్టీ 17 పాయింట్లు పుంజుకుని 11,721 వద్ద ట్రేడవుతోంది. సాధారణంగా దేశీ మార్కెట్ల ట్రెండ్‌ను ఎస్‌జీఎక్స్ నిఫ్టీ ప్రతిఫలిస్తూ ఉంటుంది. బుధవారం ప్రపంచవ్యాప్తంగా సెంటిమెంటు మెరుగుపడటంతో అమెరికా, ఆసియా మార్కెట్లు లాభపడ్డాయి. అయితే దేశీయంగా రికార్డు ర్యాలీకి బ్రేక్‌ పడింది. రూపాయి పతనం, ఎఫ్‌అండ్‌వో ముగింపు నేపథ్యంలో ట్రేడర్లు లాభాల స్వీకరణకు దిగడంతో మార్కెట్లు వెనకడుగు వేశాయి. రెండు రోజులుగా లాభాల దౌడు తీయడం కూడా దీనికి కారణంకాగా.. మిడ్‌సెషన్‌ నుంచీ అమ్మకాలు పెరిగాయి. చివరికి సెన్సెక్స్‌ 174 పాయింట్లు పతనమై 38,723 వద్ద నిలవగా.. నిఫ్టీ 47 పాయింట్లు క్షీణించి 11,692 వద్ద స్థిరపడింది. కాగా.. నేడు ఆగస్ట్‌ డెరివేటివ్స్‌ గడువు ముగియనున్న కారణంగా మార్కెట్లు హెచ్చుతగ్గుల మధ్య కదిలే అవకాశమున్నట్లు నిపుణులు భావిస్తున్నారు.

నిఫ్టీ కదలికలు ఇలా..! 
నేడు నిఫ్టీ బలహీనపడితే తొలుత 11,663 పాయింట్ల వద్ద, తదుపరి 11,633 స్థాయిలోనూ మద్దతు లభించే వీలున్నదని సాంకేతిక నిపుణులు అంచనా వేశారు. ఒకవేళ ఊపందుకుంటే.. తొలుత 11,737 పాయింట్ల వద్ద, తదుపరి 11,782 స్థాయిలోనూ రెసిస్టెన్స్‌ ఎదురుకావచ్చని భావిస్తున్నారు. కాగా.. బ్యాంక్‌ నిఫ్టీకి 28146, 28069 పాయింట్ల వద్ద మద్దతు, 28323, 28422 స్థాయిల వద్ద అవరోధాలు ఎదురుకావచ్చని పేర్కొంటున్నారు.

ఎఫ్‌పీఐల అమ్మకాలు
నగదు విభాగంలో బుధవారం విదేశీ పోర్ట్‌ఫోలియో ఇన్వెస్టర్లు(ఎఫ్‌పీఐలు) దాదాపు రూ. 1416 కోట్ల విలువైన స్టాక్స్‌ విక్రయించారు. అయితే ఇందుకు ధీటుగా దేశీ ఫండ్స్‌(డీఐఐలు) రూ. 1114 కోట్లను ఇన్వెస్ట్‌ చేశాయి. కాగా.. మంగళవారం ఎఫ్‌పీఐలు రూ. 161 కోట్లు, డీఐఐలు రూ. 199 కోట్ల విలువైన స్టాక్స్‌ విక్రయించిన సంగతి తెలిసిందే.