మళ్లీ పెరిగిన పెట్రో ధరలు.. చేతులెత్తేసిన కేంద్రం

petrol-diesel-rates-huge-hike

భారత్ బంద్ కు ముందే దేశ వ్యాప్తంగా పెట్రో వార్ మొదలైంది. వారం రోజులుగా పెరుగుతూ పోతున్న రేట్లపై జనం భగ్గుమంటున్నారు. పార్టీలు బంద్ కు ఒక రోజు ముందుగానే నిరసనలతో సీన్ హీటెక్కిస్తున్నాయి. మరోవైపు దేశవ్యాప్తంగా ఆగ్రహం వ్యక్తం అవుతున్నా..పెట్రో కంపెనీలు తమ దూకుడుపై వెనక్కి తగ్గలేదు. ఆదివారం మళ్లీ రేట్లను పెంచేశాయి. దీంతో హైదరాబాద్ లో లీటర్ పెట్రోల్ ధర 85 రూపాయల 35 పైసలకు చేరింది.

పెట్రో అస్త్రంతో కేంద్రంపై యుద్ధానికి సిద్ధమయ్యాయి విపక్షాలు. అడ్డు అదుపు లేకుండా పైపైకి ఎగబాగుతున్న పెట్రో రేట్లపై జనాల్లో ఇప్పటికే తీవ్ర అసంతృప్తి నెలకొని ఉంది. ఇక ఈ వారంలో వరుస బాదుడుతో ఆ ఆసంతృప్తి కట్టలు తెచ్చుకొని ఆగ్రహంగా మారుతోంది. పెట్రో, డీజీల్ రేట్లు పెంపు సరకు రవాణాతో పాటు మార్కెట్ రంగాలపై ప్రభావం చూపుతున్నాయి. నోట్ల రద్దు సమయంలో ఓపిక పట్టిన పార్టీలు పెట్రో రేట్ల విషయంలో కేంద్రంపై యుద్ధానికి సిద్ధమయ్యాయి.

పెరిగిన పెట్రో రేట్లకు నిరసనగా సోమవారం భారత్ బంద్ కు పిలుపునివ్వగా..ఆదివారం నుంచే బంద్ సన్నాహాక నిరసనలు ఊపందుకున్నాయి. పెట్రోల్ రేట్లను వ్యతిరేకిస్తూ పలు చోట్ల ఆందోళనలు చేపట్టారు. ఏపీ, తెలంగాణ జిల్లాలో బైక్ ర్యాలీలతో బంద్ కు మద్దతు ప్రకటించారు. ఏపీలో వైసీపీ పిలుపుతో ఆ పార్టీ నేతలు, కార్యకర్తలు రాష్ట్రంలో నిరసన కార్యక్రమాలు చేపట్టారు.

ఎన్నికల సీజన్ కావటంతో సోమవారం నాటి భారత్ బంద్ కు ప్రధాన్యత ఏర్పడింది. నిరసనను ఎలాగైనా విజయవంతం చేసి సత్తా చాటుకోవాలని కాంగ్రెస్, దాని మిత్ర పక్షాలు కసితో ఉన్నాయి. బంద్ సంపూర్ణం చేసి తమ బలాన్ని చాటుకోవటంతో పాటు..బీజేపీ పట్ల ప్రజల్లో వ్యతిరేకత ఉందని చాటే లక్ష్యంతో ఉన్నాయి. ఈ భారత్ బంద్ పార్టీల పొత్తు సంకేతాలకు కూడా కేంద్రంగా మారింది. కాంగ్రెస్ ఇచ్చిన బంద్ పిలుపునకు ఆ పార్టీతో కలిసొచ్చే ప్రాంతీయ పార్టీలన్ని మద్దుతు తెలిపాయి. అయితే.. ఏపీలో భారత్ బంద్ పై రాజకీయ దుమారం రాజుకుంది. కాంగ్రెస్ చేపట్టిన బంద్ కు టీడీపీ మద్దతు తెలపటాన్ని వైసీపీ తప్పుబడుతోంది. తెలంగాణలో కాంగ్రెస్ తో పొత్తు పెట్టుకున్న టీడీపీ, ఏపీలో నూ స్నేహ గీతం పాడుతోందని వైసీపీ నేతలు విమర్శిస్తున్నారు.

వైసీపీ వాదనను లెఫ్ట్ పార్టీ నేతలు తప్పుబడుతున్నారు. కాంగ్రెస్, టీడీపీ వేర్వేరుగా బంద్ కు పిలుపునిచ్చాయని సీపీఐ నేత నారాయణ అన్నారు. పెట్రో రేట్లపై ఆందోళనలో పాల్గొనని పార్టీలు దేశ ద్రోహులుగా మిగిలిపోతారని విమర్శించారు.

పెట్రోల్ రేట్లపై దేశమంతా రాజకీయం హీటెక్కిపోతుంటే.. పెట్రో కంపెనీలు మాత్రం వెనక్కి తగ్గటం లేదు. పుండు మీద కారం చల్లినట్లు ఆదివారం మరోసారి ధరలను పెంచాయి. దీంతో లీటర్ పెట్రోల్ ధర 85 రూపాలయ 35 పైసలకు పెరిగింది. డీజీల్ 78 రూపాయల 98 పైసలు అయ్యింది. డాలర్ తో రూపాయి మారకం విలువ పడిపోవటంతో పెట్రో రేట్లు పెంచటం అనివార్యమని కంపెనీలు చెబుతున్నాయి. అటు కేంద్రం కూడా మేం ఏం చేయలేం అంటూ చేతులేత్తేసింది.

- ఉచితంగా మీ జాతకాన్ని తెలుసుకోండి -