Spider Man Comic: అది కేవలం ఒక పేపర్.. కానీ దాని ధర రూ. 24 కోట్లు..

Spider Man Comic: నచ్చిన వస్తువులను వేలం పాట వేస్తే.. అవి ఎంత ధర పెట్టి కొనడానికి అయినా.. వెనకాడరు కొందరు. ముఖ్యంగా తమకు నచ్చిన సెలబ్రిటీలకు సంబంధించిన వస్తువులు అయితే.. ఇక వేలంలో వెనక్కి తగ్గే సమస్యే లేదు అనుకుంటారు. తాజాగా అలా అనుకొని ఓ స్పైడర్ మ్యాన్ అభిమాని.. ఆ క్యారెక్టర్‌కు సంబంధించిన కామిక్ పేజీని ఏకంగా రూ. 24 కోట్లు పెట్టి వేలంపాటలో కొన్నాడు.

ఫిక్షనల్ క్యారెక్టర్స్‌లో చాలామందికి ఇష్టమైన క్యారెక్టర్‌లలో ఒకటి స్పైడర్ మ్యాన్. ఇప్పటికీ స్పైడర్ మ్యాన్‌కు ఉన్న ఫ్యాన్ ఫాలోయింగ్ ఏ మాత్రం తగ్గలేదు. ఆ మధ్య విడుదలయిన స్పైడర్ మ్యాన్ నో వే హోమ్‌కు ఇండియాలో వచ్చిన కలెక్షన్సే దీనికి ఉదాహరణ. అందుకే 1984 నాటి స్పైడర్ మ్యాన్ కామిక్ పేజీని కొనడానికి కూడా కోట్లు పెట్టడానికి ఆలోచించలేదు ఓ వ్యక్తి.

స్పైడర్ మ్యాన్ పాత్ర క్రియేట్ చేసిన తర్వాత చాలాకాలం పాటు కామిక్ వరల్డ్‌లో కూడా మకుటం లేని మహారాజుగా వెలిగిపోయాడు. స్టాన్ లీ, స్టీవ్ డిట్కోచే ప్రాణం పోసిన ఈ పాత్రపై సినిమాలు తెరకెక్కించడమే కాకుండా.. ఎన్నో కామిక్ పుస్తకాలు కూడా రచించబడ్డాయి. అయితే 1984లో పబ్లిష్ అయిన సింగిల్ స్పైడర్ మ్యాన్ కామిక్‌లోని 25వ పేజీ ఇప్పుడు ఏకంగా రూ. 24 కోట్లు వేలం పలకడం అందరినీ ఆశ్చర్యానికి గురిచేస్తోంది.