Top

ప్రపంచకప్‌లో టీమిండియాకు అసలైన సవాల్‌..

ప్రపంచకప్‌లో టీమిండియా అసలైన సవాల్‌కు సిధ్ధమైంది. సఫారీలను ఓడించి శుభారంభం చేసిన కోహ్లీసేన ఇవాళ టైటిల్ ఫేవరెట్స్‌లో ఒకటైన ఆస్ట్రేలియాతో తలపడబోతోంది. తొలి మ్యాచ్‌ సౌతాఫ్రికాను మట్టికరిపించిన మెన్‌ ఇన్‌ బ్లూ.. ఆస్ట్రేలియాను కంగారెత్తించేందుకు ఉవ్విళ్లూరుతున్నారు. భారత్‌-ఆస్ట్రేలియా మ్యాచ్‌ కోసం అభిమానులు ఉత్కంఠగా ఎదురు చూస్తున్నారు.

నిజానికి సఫారీలతో మ్యాచ్‌లో కోహ్లీసేనకు పెద్దగా పోటీ ఎదురుకాలేదు. భారత బౌలర్లు సమిష్టిగా రాణించి సౌతాఫ్రికాను తక్కువ స్కోర్‌కే కట్టడి చేశారు. తర్వాత ఛేజింగ్‌లో కాస్త తడబడినా... రోహిత్‌శర్మ సెంచరీతో మ్యాచ్‌ను గెలుచుకుంది. అయితే ఆసీస్‌తో మ్యాచ్ మాత్రం అంత సులువుగా ఉండే పరిస్థితి లేదు. ఒకప్పటి ఆసీస్‌లా ఆ జట్టును చూసి కంగారుపడే పరిస్థితి లేకున్నా... తేలిగ్గా తీసుకుంటే మాత్రం మూల్యం చెల్లించుకోవాల్సిందే అంటున్నారు విశ్లేషకులు.

బాల్ టాంపరింగ్ వివాదంతో మసకబారిన ఆసీస్.. వరల్డ్‌కప్‌కు ముందు భారత గడ్డపై సిరీస్ గెలుచుకున్న విషయం ఎవ్వరూ మరిచిపోలేదు. స్మిత్‌,వార్నర్ లేకున్నా... సొంతగడ్డపై భారత్‌ను నిలువరించిన ఆసీస్‌ ప్రస్తుతం వరల్డ్‌కప్‌లో ఫేవరెట్‌గా దూసుకెళుతోంది. ఇప్పుడు స్మిత్‌,వార్నర్ ఎంట్రీతో మరింత బలపడిన ఆ జట్టు టీమిండియాకు సవాల్ విసరడం ఖాయంగా కనిపిస్తోంది.

ప్రస్తుత వరల్డ్‌కప్‌లో వరుసగా రెండు విజయాలను అందుకున్న ఆసీస్‌.. విండీస్‌పై ఛాంపియన్ ఆటతీరుతో ఆకట్టుకుంది. 89 పరుగులకే సగం వికెట్లు చేజార్చుకున్నా... తర్వాత అద్భుతంగా పుంజుకుని కరేబియన్ టీమ్‌ను నిలువరించింది. రెండు విజయాలతో మాంచి జోష్‌లో ఉంది. సఫారీలపై నిరాశపరిచిన ధావన్, కోహ్లీ ఆసీస్‌పై బ్యాట్‌కు పనిచెప్పాల్సిందే. రెండో మ్యాచ్‌లో కంగారూలను ఓడిస్తే టోర్నీలో భారత్‌ జోరుకు బ్రేక్ వేయడం కష్టమే అని చెప్పాలి. ఒకవేళ కంగారూల చేతిలో ఓడితే మాత్రం తీవ్ర ఒత్తిడిలో పడటం ఖాయం. ముఖ్యంగా పాకిస్థాన్‌తో మ్యాచ్‌కు ముందు ఓటమి ఏమాత్రం జట్టుకు మంచిదికాదనే అభిప్రాయం అందరిలోనూ వ్యక్తం అవుతోంది.

రికార్డుల పరంగా మాత్రం ఆసీస్‌దే పైచేయిగా ఉంది. ప్రపంచకప్‌లో ఇప్పటివరకూ 11 మ్యాచ్‌లలో తలపడితే 8 సార్లు ఆసీస్ గెలవగా...3 సార్లు మాత్రమే భారత్ విజయం సాధించింది. ప్రస్తుత ఫామ్‌ ప్రకారం ఇరు జట్లూ సమ ఉజ్జీలుగా కనిపిస్తున్నాయి. ఏదేమైనా కోహ్లీసేన తొలి మ్యాచ్‌ను మించిన ఆటతీరుతో కంగారూల్ని మట్టికరిపించాలని అభిమానులు ఆశిస్తున్నారు.

Next Story

RELATED STORIES