తూర్పుగోదావరి జిల్లాలో దారుణం.. యువతిపై సామూహిక అత్యాచారం

తూర్పుగోదావరి జిల్లా మండపేట మండలంలో దారుణం జరిగింది. నిస్సహాయురాలైన ఓ యువతిపై కొందరు దుర్మార్గులు సామూహిక అత్యాచారం చేశారు. వదిలేయమని బతిమాలుతున్నా కనికరించలేదు. దారుణం చేశాక.. ఎవరికైనా చెబితే ప్రాణాలు తీస్తామని బెదిరించారు. మండపేట మండలం ఇప్పటపాడుకు చెందిన ఓ విద్యార్థిని.. ఓప్రయివేటు డిగ్రీకాలేజీలో ఫైనల్ ఇయర్ చదువుతోంది. కాలేజ్ ఫేర్‌వెల్‌ కార్యక్రమం పూర్తయ్యాక.. అందరూ ఫోటోలు దిగారు. ఆ తర్వాత ఆ విద్యార్థిని తన స్నేహితుడితో కలిసి మండపేట బైపాస్ రోడ్‌కు కూతవేటు దూరంలో ఉన్న సంగంకాలనీ రోడ్‌లో ఓ చోట కూర్చొని మాట్లాడుకుంటున్నారు. ఈలోగా మండపేటకు చెందిన వల్లూరి రామకృష్ణ, సుంకర సత్యనారాయణ, చేమంతి మధు, ములకల వీర బాబు.. ఆ విద్యార్థిని స్నేహితుడిని బెదిరించారు. అక్కడి నుంచి దూరంగా తీసుకెళ్లి స్థానిక సత్యశ్రీ థియేటర్ వద్ద బందించారు. మిగిలిన ముగ్గురూ ఆమెను పొదల్లోకి తీసుకెళ్లి దారుణానికి ఒడిగట్టారు.

ఘటన జరిగాక బాధితురాలు అక్కడే స్పృహ కోల్పోయి పడిపోయింది. ఆ తర్వాత ఆమె స్నేహితుడు అక్కడి మరికొందరు ఫ్రెండ్స్‌ను తీసుకొచ్చి ఇంటికి తీసుకెళ్లారు. తనపై అత్యాచారం జరిగిన ఘటన ఎవరికీ చెప్పద్దని తన స్నేహితులను వేడుకుంది. ఈ నేపథ్యంలో తమ కళ్లముందే స్నేహితురాలికి జరిగిన అన్యాయాన్ని జీర్ణించుకోలేని ఫ్రెండ్స్ తన బాధను సోషల్ మీడియాలో బాహ్య ప్రపంచానికి ద్వారా తెలిపారు. ఈ క్రమంలో నిందితులు ఓ వైసీపీ నేతను సహాయం కోసం ఆశ్రయించారు. అయితే అతను మద్దతు ఇవ్వనని తేల్చి చెప్పాడు. ఆ తర్వాత పోలీసులు ధైర్యం చెప్పడంతో బాధితురాలు మండపేట వచ్చి ఫిర్యాదు చేశారు. బాధితురాలిని కాంగ్రెస్‌ సీనియర్ నేత హర్షకుమార్ పరామర్శించారు. అటు మహిళా సంఘాలు కూడా.. పోలీస్ స్టేషన్‌ వద్దకు చేరుకుని బాధితురాలికి మద్దతుగా నిలిచాయి.