బావుందమ్మా వరస.. పాప పేరు కరోనా.. బాబు పేరు లాక్‌డౌన్
పగలు, రాత్రి అదే టాపిక్.. ఏ ఇద్దరు మాట్లాడుకున్నా అదే ముచ్చట. కరోనా, లాక్‌డౌన్. మరి ఈ టైమ్‌లో పుట్టిన మా బుజ్జాయిలకి ఆపేర్లే పెట్టేస్తే పోలా అని.. ఒకరికి కరోనా అని మరొకరికి లాక్‌డౌన్ పేర్లు పెట్టేసి ముచ్చట తీర్చుకున్నారు ఆ జంటలు. కరోనా వైరస్ ప్రపంచాన్ని కబళిస్తున్న ఈ సమయంలో ప్రధాని నరేంద్ర మోదీ చేసిన ప్రయత్నాన్ని అభినంధిస్తూ తమ బిడ్డకు లాక్‌డౌన్ అని పేరు పెట్టినట్లు పవన్ తెలియజేశారు.
ఉత్తర ప్రదేశ్ డియోరియా జిల్లాకు చెందిన పవన్ తన భార్య ఇదే సమయంలో డెలివరీ అవడంతో ఈ పేరు పెట్టాలని నిర్ణయించుకున్నట్లు తెలిపారు. ఏప్రిల్ 14 వరకు బంధువుల రాకపోకలకు అనుమతి లేనందున ఎటువంటి వేడుకలు జరపకుండా తమ బిడ్డకు పేరు పెట్టామని చెప్పారు.
ఇక ఇదే సంప్రదాయాన్ని కొనసాగిస్తూ గత వారం గోరఖ్‌పూర్‌ సోహగురా గ్రామానికి చెందిన ఓ మహిళకు పుట్టిన బిడ్డకు మేనమామ కరోనా అని పేరు పెట్టారు.. వైరస్‌కి వ్యతిరేకంగా ప్రపంచాన్ని ఏకం చేసినందున అప్పుడే పుట్టిన పాపాయికి కరోనా అని పెట్టాలని నిర్ణయించుకున్నట్లు మామ నితేష్ త్రిపాఠి తెలిపారు. ఈ వైరస్ ప్రపంచంలోని చాలా మంది ప్రాణాలను బలిగొంటోంది. కానీ మనకు చాలా మంచి అలవాట్లను నేర్పించింది. ప్రపంచాన్ని దగ్గర చేసింది. ప్రజల ఐక్యతకు చిహ్నంగా ఉంటుందని మా చిన్నారికి కరోనా అని పేరు పెట్టినట్లు త్రిపాఠి తెలిపారు.
