Top

రూ. 2 కోట్ల విలువైన అపార్ట్‌మెంట్‌ కోసం గొడవ..

రూ. 2 కోట్ల విలువైన అపార్ట్‌మెంట్‌ కోసం గొడవ..
X

బెజవాడ గ్యాంగ్‌వార్‌లో గాయపడ్డ తోట సందీప్‌.. ఆస్పత్రిలో చికిత్స పొందుతూ మృతి చెందాడు. సందీప్‌పై గతంలో సస్పెక్ట్‌ షీట్‌ ఉన్నట్లు తెలిపారు పోలీసులు. సందీప్‌ మృతదేహాన్ని ఇంకా బంధువులకి అప్పగించలేదు ఆసుపత్రి వర్గాలు. దీంతో ఆందోళనకు దిగారు సందీప్‌ అనుచరులు. ఓ భూ వివాదంలో ఈ గొడవ జరిగినట్లు పోలీసులు తెలిపారు. ఇప్పటికే సందీప్‌పై 13 కేసులు, పండుపై 3 కేసులున్నట్లు వెల్లడించారు. ఇరు వర్గాలను అదుపులో తీసుకున్నట్లు వెల్లడించారు పోలీసులు.

యనమలకుదురులో 2 కోట్ల రూపాయల విలువైన భూసెటిల్‌మెంట్‌లో రెండు గ్రూపుల మధ్య వివాదం తలెత్తినట్లు తెలుస్తోంది. ఓ అపార్ట్‌మెంట్‌ విషయంలో తోట సందీప్ గ్రూపు, మణికంఠ అలియాస్‌ పండు గ్రూపులు గొడవకు దిగాయి. ఇది తీవ్రస్థాయికి చేరడంతో పరస్పరం కత్తులు, రాళ్లతో దాడి చేసుకున్నాయి. ఈ ఘటనలో గ్యాంగ్ లీడర్లలిద్దరూ గాయపడగా... వీరిని ఆసుపత్రిలో చేర్పించారు వారి అనుచరులు. అయితే సందీప్ ఆసుపత్రిలో చికిత్స పొందుతూ మృతి చెందాడు.

ఈ భూసెటిల్‌మెంట్‌ వ్యవహరంలో ఇద్దరి మధ్య మనస్పర్థలు వచ్చినట్లు తెలుస్తోంది. అపార్ట్‌మెంట్‌ గురించి సెటిల్‌మెంట్ చేసేందుకు సందీప్ ఒప్పుకున్నాడు. ఇదే అపార్ట్‌మెంట్‌ విషయంలో పండు సైతం జోక్యం చేసుకోవడంతో వీరి మధ్య దూరం పెరిగింది. దీంతో ఈ అంశంపై మాట్లాడుకుందామనే నిర్ణయానికి వచ్చారు సందీప్‌, పండు.

పటమటలోని డొంకరోడ్డులో వీరిద్దరూ కలసి మాట్లాడుకుంటుండగా ఉన్నట్టుండి గొడవ మొదలైంది. అప్పటికే వెంట తెచ్చుకున్న కత్తులతో ఒకరినొకరు పొడుచుకున్నారు. రాళ్లతో దాడులు చేసుకున్నారు. పరస్పరం దాడుల దిగడంతో పటమట ఏరియాలో కలకలం రేగింది. ఈ స్ట్రీట్ ఫైట్‌లో 30 మంది పాల్గొన్నట్లు తెలుస్తోంది. ఈ గ్యాంగ్ వార్‌తో బెజవాడ వాసులను భయాందోళనకు గురయ్యారు. ఇందులో ఎవరెవరి ప్రమేయం ఉందనే దానిపై దర్యాప్తు చేస్తున్నట్లు తెలిపారు పోలీసులు.

Next Story

RELATED STORIES