నిసర్గ తుపాన్.. 17 ఇండిగో విమాన సర్వీసులు రద్దు

ముంబై నగరాన్ని నిసర్గ్ తుపాన్ ముంచెత్తుతోంది. ముందు జాగ్రత్త చర్యగా 17 ఇండిగో విమాన సర్వీసులను రద్దు చేస్తున్నట్లు విమానయాన సంస్థ ప్రకటించింది. బుధవారం ముంబై నుంచి కేవలం 3 విమానాలను మాత్రమే నడిపామని, 17 విమాన సర్వీసులను రద్దు చేశామని ఇండిగో అధికార ప్రతినిధి తెలిపారు. విస్తారా ఎయిర్‌లైన్స్ కూడా తమ రాకపోకలను రద్దు చేసింది. ప్రయాణీకుల భద్రత దృష్ట్యా ఈ నిర్ణయం తీసుకున్నామని విమానయాన సంస్థల అధికారులు తెలిపారు. విమానాశ్రయం రన్‌వేపై నీరు నిలవకుండా పంపులను ఏర్పాటు చేసి నీటిని బయటకు తోడేస్తున్నారు. ఛత్రపతి శివాజీ మహరాజ్ అంతర్జాతీయ విమానాశ్రయంలో భద్రతపై విమానాశ్రయ అధికారులు సమావేశమై తీసుకోవాల్సిన ముందు జాగ్రత్తల గురించి చర్చించారు.