పురిటి నొప్పులతో బాధపడుతున్న గర్భిణిని..

నిండు గర్భిణి. పురిటి నొప్పులతో బాధపడుతోంది. అసలే మన్యం. ఆపై పెద్దాస్పత్రికి వెళ్లాలంటే వాహన సౌకర్యం లేదు. దీంతో పురిటి నొప్పులతో నరకయాతన పడుతున్న ఆ నిండు గర్భిణిని జోలె కావడిలో తరలించారు గ్రామస్తులు. మన్యంలో జరిగిన ఈ హృదయ విదారక ఘటన అందరిని కలచి వేస్తోంది.

విశాఖ జిల్లా వి.మాడుగుల మండలం కొత్తవలస గ్రామానికి చెందిన దేవి అనే గర్భిణికి పురిటి నొప్పులు రావడంతో.. ఏకంగా 5 కిలోమీటర్లు జోలె కావడిలో మోసుకెళ్లారు గ్రామస్తులు. వర్షంలోనే తడుస్తూ అత్యంత కష్టంగా కేజే పురం ప్రభుత్వాస్పత్రికి తీసుకెళ్లారు. ఆస్పత్రిలో పండంటి బిడ్డకు జన్మనిచ్చింది . ప్రస్తుతం తల్లి బిడ్డలు క్షేమంగా ఉన్నారు.ఈ ఘటన మన్యం వాసుల కష్టాలకు అద్దం పడుతోంది. సరైన సౌకర్యాలు లేక ఆదివాసులు, గిరిజనులు పడుతున్న ఇబ్బందులు అంతా ఇంతా కాదు. ఆపద వస్తే సమయానికి ఆస్పత్రికి చేరుకోకపోతే ప్రాణాలను పణంగా పెట్టాల్సిందే.