నాన్న కాదు నరరూప రాక్షసుడు.. కూతురిని గర్భవతిని చేసి..

Molested: నాన్న ఉన్నారుగా నీకేం భయంలేదు అని అమ్మ చెప్పాలంటే భయపడే రోజు వస్తుందని కలలో కూడా ఊహించలేదు ఆ తల్లి. పదిహేనేళ్ల కూతురిపై పలు మార్లు అత్యాచారానికి పాల్పడి గర్భవతిని చేశాడు. నాన్నే బిడ్డ జీవితాన్ని సర్వనాశనం చేశాడని తల్లి కన్నీరు మున్నీరవుతోంది. కామవాంఛలు తీర్చుకునేందుకు కన్నబిడ్డని సైతం చెరబడుతున్నాడని తెలిసి కడుపులో దేవినట్లవుతుంది.

తాజాగా ప్రకాశం జిల్లా బెస్తవారి పేట గ్రామానికి చెందిన ఓ వ్యక్తి కుటుంబసభ్యులతో కలిసి ఊరికి దూరంగా నివసిస్తున్నాడు. ఇంట్లో భార్య, 15 ఏళ్ల కూతురుతో పాటు ఉంటున్నాడు. తాగుడికి బానిసైన అతడు సంపాదనలో సగం మద్యానికే ఖర్చు పెడుతుంటాడు. జనవరి నెలలో బాలిక తల్లి సరుకులు తీసుకొచ్చేందుకు పక్కనే ఉన్న సంగరపల్లికి వెళ్లింది.ఆ సమయంలో ఇంట్లోనే తాగి పడుకున్న తండ్రి కూతురిపై అత్యాచారానికి పాల్పడ్డాడు. ఈ విషయం బయటకు చెబితే చంపేస్తానని కుమార్తెను బెదిరించాడు. ఎవరికి చెప్పట్లేదని భావించి పలుమార్లు అత్యాచారానికి పాల్పడ్డాడు. దీంతో ఆమె గర్భం దాల్చింది.

అమ్మకి ఆలస్యంగా తెలిసినా చంపేస్తానని భర్త బెదిరించడంతో మిన్నకుండి పోయింది. ఈ మధ్య తరచూ బాలికను కొడుతుండడంతో 100 నంబరుకు ఫోన్ చేసి పోలీసులకు తెలిపింది తల్లి. తరువాత బాలిక అమ్మమ్మ, తాతయ్యల ఇంటికి వెళ్లి జరిగిన విషయాన్ని వివరించింది. వాళ్లు బుధవారం పోలీసులకు ఫిర్యాదు చేశారు. ఈ మేరకు పోలీసులు కేసు నమోదు చేసుకుని దర్యాప్తు చేస్తున్నారు.