Punjab : పంజాబ్ లో పొత్తు లేదు : ఇండియా కూటమికి గట్టి దెబ్బ

ఆమ్ ఆద్మీ పార్టీ (AAM) అధినేత అరవింద్ కేజ్రీవాల్ (Kejriwal) కీలక ప్రకటన చేశారు. వచ్చే సార్వత్రిక ఎన్నికల్లో తమ పార్టీ పంజాబ్‌లోని మొత్తం 13 లోక్‌సభ స్థానాల్లో పోటీ చేస్తుందని ప్రకటించారు. కేంద్రంలో బీజేపీని ఓడించాలనే లక్ష్యంతో ఉన్న ఆప్ ఇండియా కూటమికి కేజ్రీవాల్ ప్రకటన పెద్ద దెబ్బ. కాంగ్రెస్, ఆప్ ప్రతిపక్ష కూటమిలో ఒక భాగమన్న సంగతి తెలిసిందే. అయితే పంజాబ్‌లోని మొత్తం 13 లోక్‌సభ స్థానాలకు, చండీగఢ్‌లోని 1 స్థానాలకు ఆప్ అభ్యర్థులను 10-15 రోజుల్లో ప్రకటిస్తుందని కేజ్రీవాల్ తెలిపారు.

గత అసెంబ్లీ ఎన్నికల్లో పంజాబ్‌లో పార్టీ సాధించిన చారిత్రాత్మక విజయాన్ని ప్రజలకు గుర్తు చేసిన కేజ్రీవాల్, లోక్‌సభ ఎన్నికల్లో కూడా పార్టీకి ఓటు వేయాలని ప్రజలను కోరారు. ‘రెండేళ్ల క్రితం మీరు మాకు దీవెనలు ఇచ్చారు. 117 సీట్లలో 92 సీట్లు మాకు ఇచ్చారు (అసెంబ్లీ ఎన్నికల్లో) మీరు పంజాబ్‌లో చరిత్ర సృష్టించేలా చేశారు. మరోసారి ఆశీర్వాదం కోరుతూ నేను ముకుళిత హస్తాలతో మీ వద్దకు వచ్చాను. రానున్న 10-15 రోజుల్లో 14 స్థానాల్లో ఆప్ తన అభ్యర్థులను ప్రకటిస్తుంది అని చెప్పారు.

లోక్‌సభ ఎన్నికల్లో పంజాబ్‌లోని అన్ని స్థానాలను ఆప్ గెలుస్తుందని పునరుద్ఘాటించిన ఆ రాష్ట్ర ముఖ్యమంత్రి భగవంత్ మాన్, ఈ నెలాఖరులోగా పార్టీ అభ్యర్థులందరినీ ప్రకటిస్తామని చెప్పారు. "ఈ నెలాఖరులోగా, పంజాబ్‌లో మా 13 మంది అభ్యర్థులను, చండీగఢ్‌లో ఒకరిని (2024 లోక్‌సభ ఎన్నికలకు) ప్రకటిస్తాము. పంజాబ్‌లో 14-0 - 13, చండీగఢ్‌లో ఒక సీటును మేము ఆశిస్తున్నాము" అని అన్నారు.