Tulip Garden : వరల్డ్ బుక్ ఆఫ్ రికార్డ్స్లో శ్రీనగర్ తులిప్ గార్డెన్
ప్రకృతి అంటే ప్రేమ ఉన్నవారు కచ్చితంగా చూడాల్సిన ఒక ప్రదేశం శ్రీనగర్లోని తులిప్ గార్డెన్స్.సందర్శకుల మదిని దోచే ఈ పూల సోయగాలు ఇప్పుడు అరుదైన గౌరవం దక్కింది. ఆసియాలోనే అతిపెద్ద గార్డెన్గా వరల్డ్ బుక్ ఆఫ్ రికార్డ్స్లో స్థానం దక్కించుకుంది.
జమ్మూ-కశ్మీర్లోని శ్రీనగర్లో ఉన్న ఇందిరాగాంధీ స్మారక తులిప్ గార్డెన్ 68 రకాలకు చెందిన 1.5 మిలియన్ల తులిప్ పుష్పాలతో ఆసియాలో అతిపెద్ద గార్డెన్గా ఘనత సాధించింది. జబర్వాన్ పర్వత శ్రేణుల దిగువన ఉన్న ఈ అద్భుతమైన ఉద్యానవనం శనివారం వరల్డ్ బుక్ ఆఫ్ రికార్డ్స్ (లండన్)లో స్థానాన్ని సంపాదించిందని అధికారులు ప్రకటించారు. శనివారం జరిగిన కార్యక్రమంలో ఫ్లోరికల్చర్, గార్డెన్స్ అండ్ పార్క్స్ కమిషనర్ సెక్రటరీ షేక్ ఫయాజ్ అహ్మద్కు వరల్డ్ బుక్ ఆఫ్ రికార్డ్స్ అధ్యక్షుడు సంతోష్ శుక్లా ఈ మేరకు గుర్తింపు పత్రాన్ని అందించారు.
ప్రపంచవ్యాప్తంగా చాలా నగరాల్లో తులిప్ పూల గార్డెన్లు ఉన్నాయి. అయితే శ్రీనగర్లోని తులిప్ గార్డెన్ మాత్రం ఆసియా ఖండంలోనే అతిపెద్దది. ఈ గార్డెన్ విస్తీర్ణం ఒకటి కాదు, రెండు కాదు ఏకంగా 30 హెక్టార్లు ఉంది. ప్రతి ఏటా వసంత రుతువులో పుష్పాలు వికసిస్తుంటే ఈ గార్డెన్ను తెరుస్తారు.
తులిప్స్తో కాశ్మీర్కు ఉన్న అనుబంధం వందల సంవత్సరాల నాటిది. బురదతో కూడిన ఇళ్ల పైకప్పులపై పూలను పెంచడం ద్వారా ఇది మొదలయ్యింది. తరువాత క్రమంగా ప్రజలు వాటిని కిచెన్ గార్డెన్స్ మరియు పూల పడకలలో నాటడం ప్రారంభించారు. 2005-06లో అప్పటి రాష్ట్ర ప్రభుత్వం సిరాజ్ బాగ్ను ఒక రెగల్ తులిప్ గార్డెన్గా మార్చాలని నిర్ణయించింది.. తరువాత అదికాస్త పూల రకాలతో కాశ్మీర్ యొక్క చారిత్రక సంబంధాలను కొనసాగించింది.
ఇందిరా గాంధీ మెమోరియల్ తులిప్ గార్డెన్ యొక్క గొప్పతనాన్ని గుర్తించినందుకు వరల్డ్ బుక్ ఆఫ్ రికార్డ్స్ (లండన్) బృందానికి అహ్మద్ తన ప్రగాఢ కృతజ్ఞతలు తెలిపారు. ఈ గుర్తింపు ఒక స్మారక చరిత్రాత్మక విజయంగా పేర్కొన్నారు.. ఇది శ్రీనగర్ యొక్క పూల సంపదను పెంచడమే కాకుండా కాశ్మీర్లోని ప్రశాంత లోయలలో స్థానిక ఆర్థిక వ్యవస్థ అభివృద్ధికి దోహదపడుతుందన్నారు. మానవులు, ప్రకృతి మధ్య ఉన్న బంధానికి ప్రతీక అని అభివర్ణించారు.
తులిప్ గార్డెన్ తులిప్స్ పుష్పాల అద్భుతమైన సేకరణను కలిగి ఉండటమే కాదు. మరెన్నో పూల మొక్కలు కూడా కలిగి ఉంది. సున్నితమైన డాఫోడిల్స్, సువాసనగల హైసింత్లు, ప్రకాశించే గులాబీలు, మనోహరమైన రానున్కులీ, శక్తివంతమైన మస్కారియా మరియు మంత్రముగ్ధులను చేసే ఐరిస్ పువ్వులు ఐకానిక్ తులిప్స్తో పాటుగా వికసించి ఆ ప్రదేశాన్ని రంగుల మాయం చేస్తున్నాయి. ఏటా కొన్ని లక్షల మంది పర్యాటకులు గార్డెన్ని సందర్శిస్తారు.
© Copyright 2024 : tv5news.in. All Rights Reserved. Powered by hocalwire.com