Virat Kohli: KKRతో మ్యాచ్.. విరాట్ కోహ్లీకి జరిమానా!

ఐపీఎల్ 17వ ఎడిషన్ 36వ మ్యాచ్‌లో భాగంగా ఆదివారం (ఏప్రిల్ 22) కోల్‌కతా నైట్ రైడర్స్, రాయల్ ఛాలెంజర్స్ బెంగళూరు జట్లు తలపడ్డాయి. ఈ మ్యాచ్ లో ఆర్సీబీ ఒక పరుగు తేడాతో పరాజయం పాలైంది. అయితే ఈ మ్యాచ్ లో గెలుపోటముల కంటే విరాట్ కోహ్లీ ఔటైన తీరు వివాదాస్పదంగా మారింది. హై ఫుల్ టాస్ బంతికి తనను ఔట్ గా ప్రకటించడంపై తీవ్ర అసహనం వ్యక్తం చేసిన కోహ్లీ..మైదానంలో అంపైర్ తో వాగ్వాదానికి దిగాడు. దీంతో ఇప్పుడు విరాట్ కోహ్లి జరిమానా భారాన్ని మోయాల్సి వచ్చింది. నిజానికి నిన్నటి మ్యాచ్‌లో అంపైర్ ఇచ్చిన నిర్ణయంపై అసంతృప్తి వ్యక్తం చేసిన కోహ్లీ.. ఐపీఎల్ ప్రవర్తనా నియమావళిని ఉల్లంఘించాడు. దీంతో విరాట్ కోహ్లి తీరుపై బీసీసీఐ చర్యలు తీసుకుంది. దీని ప్రకారం కోహ్లీ మ్యాచ్ ఫీజులో 50 శాతం పెనాల్టీగా చెల్లించాల్సి ఉంటుంది. ఇలా నిన్న జరిగిన రెండు మ్యాచ్‌ల్లో ముగ్గురు ఆటగాళ్లకు జరిమానా పడింది. కోహ్లి కంటే ముందు టీమిండియా కెప్టెన్ ఫాఫ్ డుప్లెసిస్ కూడా స్లో ఓవర్‌ రేట్ కారణంగా జరిమానా చెల్లించాల్సి వచ్చింది.

నిజానికి కేకేఆర్ ఇచ్చిన 223 పరుగుల లక్ష్యాన్ని ఛేదించిన ఆర్సీబీకి ఫాఫ్ డుప్లెసిస్, విరాట్ కోహ్లీ శుభారంభం అందించారు. కానీ ఇన్నింగ్స్ మూడో ఓవర్ లో హర్షిత్ రాణా వేసిన తొలి బంతికే విరాట్ కోహ్లీ వికెట్ పడింది. రాణా వేసిన స్లో ఫుల్ టాస్ బాల్ ను విరాట్ డిఫెండ్ చేసేందుకు ప్రయత్నించాడు. అయితే బంతి కోహ్లీ బ్యాట్‌కు తగిలి గాల్లోకి లేచింది. దీంతో బౌలర్ హర్షిత్ రాణా సులువైన క్యాచ్ అందుకున్నాడు. అంపైర్ కూడా ఔట్‌గా ప్రకటించాడు. అయితే అంపైర్ నిర్ణయంపై అసహనం వ్యక్తం చేసిన కోహ్లీ రివ్యూ తీసుకున్నాడు. ఇక్కడ థర్డ్ అంపైర్ కూడా కోహ్లీని ఔట్ చేశాడు. దీంతో ఆగ్రహించిన కోహ్లీ ఫీల్డ్ అంపైర్‌తో కొంతసేపు వాగ్వాదానికి దిగాడు. దీనికి సంబంధించిన వీడియో కూడా సామాజిక మాధ్యమాల్లో వైరల్ గా మారింది.