Florida: విమానం మునిగిపోయినా.. బతికి బయటపడ్డ పైలెట్.. ఎలాగంటే..

Florida: ఒక విమానం వేగంగా వచ్చి నీటిలో పడిందట. ఇక అందులో ఉన్నవారి ప్రాణాలకు గ్యారంటీ ఇవ్వలేం. అసలు ఇలాంటి ఎన్నో ఘటనల్లో విమానం దాఖలాలు దొరకడానికి కూడా చాలా సమయం పడుతుంది. కానీ ఫ్లోరిడాలో మాత్రం విమానం సముద్రంలో పడిపోయింది. పైలెట్ మాత్రం బతికి బయటపడగలిగాడు. ఈ విషయం ప్రస్తుతం సోషల్ మీడియాలో వైరల్‌గా మారుతోంది.

ఫ్లోరిడా రాష్ట్రంలోని గల్ఫ్ తీరం. అక్కడ కస్టమ్స్ అధికారులు ఎప్పటిలాగానే విధులు నిర్వహిస్తున్నారు. గస్తీలో ఉన్నవారికి సముద్రం మధ్యలో ఒక వ్యక్తి నిలబడి ఉన్నట్టుగా కనిపించింది. పైగా అతడు నిలబడి ఉన్నది ఒక మునిగిపోతున్న విమానం మీద అని వారు గుర్తించారు. అంతే వెంటనే షిప్‌లో అక్కడికి చేరుకొని అతడి ప్రాణాలు కాపాడారు.

సముద్రంలో ఉన్న ఆ విమానం దాదాపు కాక్‌పిట్ వరకు మునిగిపోయి ఉంది. అందులో నుండి ఎలాగోలా బయటపడిన దాని పైలట్.. మునిగిపోతున్న ఆ విమానం మీద నిస్సహాయంగా నిలబడి ఉన్నాడు. కస్టమ్స్ అధికారులు తనని సమయానికి గుర్తించడం వల్ల ఆ వ్యక్తి ప్రాణాలు నిలబడ్డాయి. ఈ ఫోటోలు ప్రస్తుతం సోషల్ మీడియాలో వైరల్‌గా మారుతున్నాయి. కస్టమ్స్ అధికారుల సమయస్పూర్తిని నెటిజన్లు అభినందిస్తున్నారు.