Voyager 2: అందుకే "వాయేజర్" మానవ నిర్మిత అద్భుతం
భూమి నుంచి వందల కోట్ల కిలోమీటర్ల దూరంలో సౌర కుటుంబం అవతల పయనిస్తున్న అమెరికా వ్యోమనౌక వాయేజర్-2( Voyager 2) నుంచి తిరిగి సంకేతాలు రావడం( Signal To Earth) మొదలైందని అమెరికా అంతరిక్ష పరిశోధన సంస్థ(NASA) ప్రకటించింది. రెండు వారాల క్రితం తప్పుడు కమాండ్స్‌( After Blackout) వల్ల వాయేజర్ -2 వ్యోమనౌక యాంటెన్నా భూమి దిశగా కాకుండా వేరే వైపునకు మళ్లింది. దీంతో భూకేంద్రంతో సంబంధాలు తెగిపోయాయి. నాసాకు ప్రపంచంలో పలు చోట్ల భారీ రేడియో యాంటెన్నాలు ఉన్నాయి. వాటికి తాజాగా వాయేజర్-2 నుంచి సంకేతం అందింది. దీంతో.46 ఏళ్ల నాటి ఆ వ్యోమనౌక ఇంకా పనిచేస్తోందని స్పష్టమవుతున్నట్లు నాసా పేర్కొంది. ఇప్పుడు ఆ వ్యోమనౌక యాంటెన్నాను తిరిగి భూమి వైపునకు తిప్పడానికి ప్రయత్నిస్తామని తెలిపింది.
1977లో అమెరికాలో వాయేజర్-1(Voyager 1), వాయేజర్-2 అంతరిక్ష నౌకలు(Launched in 1977) ప్రయోగించింది. అనంత విశ్వంలో దాగి ఉన్న రహస్యాల గుట్టు విప్పడమే లక్ష్యంగా ఈ వాహక నౌకలు అంతరిక్షంలోకి దూసుకెళ్లాయి. వాయేజర్ మిషన్‌ను ప్రాథమికంగా బాహ్య గ్రహాల అధ్యయనం కోసం నాసా చేపట్టింది. గురు, శని, యురేనస్, నెప్ట్యూన్ గ్రహాలను వాటి 48 చంద్రులను, ఆ గ్రహాల చుట్టూ ఉన్న వలయాలను వాయేజర్-1, 2 జంట నౌకలు అన్వేషించాయి.
వాయేజర్-2 నౌక ఇప్పటికీ అంతరిక్షంలో ప్రయాణిస్తూనే ఉంది. ఈ స్పేస్ క్రాఫ్ట్ సూర్యుడ్ని కూడా దాటిపోయింది. మన సౌర వ్యవస్థ ప్రభావం ఏమాత్రం లేని శూన్యంలో ప్రయాణిస్తోంది. వాయేజర్-2 ప్రస్తుతం 19.9 బిలియన్‌ కిలోమీటర్ల((19.9 billion kilometers) దూరంలో ఉంది. అది పంపే సంకేతాలు భూమికి చేరడానికి 18 గంటలకు పైగా సమయం పడుతోంది. భూమి నుంచి ఏదైనా సిగ్నల్ పంపితే, ఈ నౌకను చేరుకోవడానికి ఒకటిన్నర రోజు సమయం పడుతోంది.
వాయేజర్-2 2026 వరకు భేషుగ్గా పనిచేస్తుందని అమెరికా అంతరిక్ష విభాగం ఇంజినీర్లు చెబుతున్నారు. ఇది బ్యాకప్ పవర్ ను ఉపయోగించుకునేలా వారు భూమి నుంచి సిగ్నల్స్ పంపారు. వాయేజర్-2లో ఉన్న పరికరాలను కూడా మరికొన్నాళ్లపాటు పనిచేయించనున్నారు. ఈ నౌకలో ఉన్న శక్తిని పొదుపుగా వాడేందుకు అందులోని కొన్ని పరికరాలను స్విచాఫ్ చేశారు. దాంతో శక్తి ఆదా అవుతుందని, తద్వారా అంతరిక్ష నౌక మరికొన్నాళ్లు సేవలు అందిస్తుందని ఇంజినీర్లు వెల్లడించారు.
1979 జూలై 9న వాయేజర్-2 కూడా గురు గ్రహాన్ని సమీపించింది. 1986 జనవరి 24న యురేనస్‌కు దగ్గరగా... 1989, ఆగస్టు 25న నెప్ట్యూన్‌కు దగ్గరగా వాయేజర్-2 ప్రయాణించింది. వాయేజర్-2లో శక్తి కోసం రేడియో ఐసోటోప్ థర్మో ఎలక్ట్రిక్ జనరేటర్ ను పొందుపరిచారు. ఇది ప్లూటోనియం నుంచి ఉత్పన్నమయ్యే వేడిని శక్తిగా మార్చుతుంది. ప్రస్తుతం ఈ నౌక శూన్యంలో ప్రయాణిస్తూ, అంత దూరం నుంచి డేటాను భూమికి పంపిస్తుండడం వల్ల శక్తిని కోల్పోతోంది.
