Kim Jong-un: రెచ్చగొడితే అణుదాడి తప్పదు..
అణుదాడితో రెచ్చగొడితే తాము అణుబాంబు ప్రయోగానికి వెనకాడబోమని ఉత్తరకొరియా అధ్యక్షుడు కిమ్ జాంగ్ ఉన్ తాజాగా హెచ్చరించారు. గురువారం మిసైల్ బ్యూరో ఆధ్వర్యంలో ఖండాంతర బాలిస్టిక్ మిసైల్ క్షిపణి ప్రయోగం మాక్ డ్రిల్ నిర్వహించారు. ఈ కార్యక్రమంలో పాల్గొన్న కిమ్..డ్రిల్‌కు హాజరైన సైనికులను ఉద్దేశించి ప్రసంగించారు. ఈ సందర్భంగా ఆయన అణుదాడి హెచ్చరికలు చేసినట్టు ఉత్తరకొరియా వార్తా సంస్థ కేసీఎన్ఏ ఓ కథనాన్ని ప్రచురించింది. ప్రత్యర్థి అణుబాంబులతో రెచ్చగొడితే సంకోచించకుండా అణు బాంబు ప్రయోగించాలని మిసైల్ బ్యూరోకు కిమ్ సూచించినట్టు కేసీఎన్ఏ పేర్కొంది. చర్చల్లో బేషరతుగా పాల్గొనాలంటూ దక్షిణ కొరియా, దాని మిత్రదేశాలు కిమ్‌ను కోరిన నేపథ్యంలో ఈ హెచ్చరికలకు ప్రాధాన్యం ఏర్పడింది.
గతవారం వాషింగ్టన్ డీసీలో అమెరికా, దక్షిణకొరియా మధ్య కీలక సమావేశం జరిగింది. ఉత్తరకొరియాతో యుద్ధం తలెత్తే పక్షంలో అణుబాంబు ప్రయోగ నివారణకు ఏం చేయాలనే దానిపై ఈ మీటింగ్‌లో చర్చ జరిగింది. కాగా, ఉత్తరకొరియా తమపై అణ్వస్త్రాలు ప్రయోగిస్తే కిమ్ పాలన అంతమైపోతుందంటూ ఉభయ దేశాలూ సమావేశం అనంతరం ఘాటు వ్యాఖ్యలు చేశాయి. ఎటువంటి ముందస్తు షరతులు లేకుండా శాంతి చర్చల్లో పాల్గొనాలని కిమ్‌కు స్పష్టం చేశాయి. ఈ నేపథ్యంలో ఉత్తరకొరియా అధ్యక్షుడి హెచ్చరికలకు ప్రాధాన్యం ఏర్పడింది.
ఉత్తర కొరియా కవ్వింపు చర్యలను ఆపడం లేదు. స్వల్పశ్రేణి క్షిపణిని పరీక్షించిన గంటల వ్యవధిలోనే ఓ ఖండాంతర బాలిస్టిక్ క్షిపణి ని ప్రయోగించింది. గత ఐదు నెలల్లో ఉత్తర కొరియా ఓ `ఐసీబీఎం'ను ప్రయోగించడం ఇదే మొదటిసారి. దక్షిణ కొరియా, జపాన్లు ఈ ప్రయోగాన్ని ధ్రువీకరించాయి. ఈ క్షిపణి ఆరు వేల కిలోమీటర్ల ఎత్తువరకు చేరుకుందని జపాన్ తెలిపింది. దీన్ని మరింత మెరుగైన, చురుకైన ఆయుధంగా నిపుణులు భావిస్తున్నారు. అణు కార్యకలాపాలు చేపట్టకుండా ఉత్తర కొరియాను నిలువరించేందుకు మరిన్ని ప్రణాళికలు రచించాలని దక్షిణ కొరియా, అమెరికాలు యోచిస్తున్న తరుణంలో ఆ దేశం ఈ క్షిపణి ప్రయోగం చేపట్టడం గమనార్హం.
ఈ క్షిపణి దాదాపు వెయ్యి కిలోమీటర్ల దూరం ప్రయాణించి.. కొరియా ద్వీపకల్పం, జపాన్ మధ్య జలాల్లో పడినట్లు దక్షిణ కొరియా తెలిపింది. గరిష్ఠంగా 6,000 కిలోమీటర్ల ఎత్తు వరకు చేరుకుందని జపాన్ అంచనా వేసింది. ఈ ప్రయోగ ఫలితాలు ఉ.కొరియా ఈ ఏడాది జులైలో నిర్వహించిన 'హ్వసాంగ్-18' క్షిపణి రెండో పరీక్షతో సరిపోలాయి. అంతకుముందు ఏప్రిల్లో తొలిసారి ఈ క్షిపణిని పరీక్షించింది. కిమ్ జోంగ్ ఉన్ గతంలో 'హ్వసాంగ్-18'ని తన అణ్వాయుధాల్లో అత్యంత శక్తిమంతమైనదిగా పేర్కొన్నారు. అమెరికా, ద.కొరియా, జపాన్లు తాజా క్షిపణి ప్రయోగాన్ని ఖండించాయి.
