పాకిస్థాన్ మాజీ అధ్యక్షుడు అరెస్ట్

పాకిస్థాన్ మాజీ అధ్యక్షుడు, మాజీ ప్రధాని బేనజీర్‌ భుట్టో భర్త ఆసిఫ్‌ అలీ జర్దారీని సోమవారం పాక్ పోలీసులు అరెస్టు చేశారు. కొంతకాలంగా అవినీతి ఆరోపణలు ఎదుర్కొంటున్న ఆయనపై మనీలాండరింగ్‌ కేసులు విచారణ దశలో ఉన్నాయి. ఆయన హయాంలో అధికార దుర్వినియోగానికి పాల్పడ్డారన్న అభియోగాలు ఎదుర్కొంటున్న అలీ నిర్వహిస్తున్న లావాదేవీలపై నేషనల్‌ అకౌంటబిలిటి బ్యూరో(అవినీతి నిరోధక శాఖ) అధికారులు నిఘా ఉంచారు. అంతేకాకుండా ఆయన కంపెనీలకు చెందిన పలు అకౌంట్ల ద్వారా సోదరితో కలిసి సుమారు 150 మిలియన్‌ డాలర్ల నగదు లావాదేవీలు జరిగినట్టు గుర్తించారు. ఆ అకౌంట్లు నకిలీవిగా గుర్తించిన దర్యాప్తు అధికారులు అలీతో పాటు ఆయన సోదరిని అదుపులోకి తీసుకున్నారు.