వాట్సాప్ వార్త ఎంత పనిచేసింది.. బతికుండగానే చంపేసింది
సోషల్ మీడియాలో అసత్య ప్రచారాలకు అడ్డు అదుపు లేకుండాపోతోంది. అర్ధంలేని మెసేజ్లతో బతికి ఉన్నవారిని కూడా చంపేస్తున్నారు. సామాజిక మాధ్యమాలు నకిలీ వార్తల ప్రచారానికి కేంద్రాలుగా మారుతున్నాయి. తాజాగా ఓ సామాన్యుడు కూడా సోషల్ మీడియా దెబ్బ ఏంటో రుచి చూశాడు. అతను బతికి ఉండగానే చనిపోయాడంటూ ఓ వార్త వాట్సాప్లో వైరల్గా మారింది. అయితే ఆ వార్తను ముందు అంతగా పట్టించుకోని అతను తర్వాత మెసేజ్లు, ఫోన్ కాల్స్ సంఖ్య పెరుగుతుండటంతో పోలీసులను ఆశ్రయించాడు.
ముంబైకి చెందిన రవీంద్ర దుసాంగే అనే వ్యక్తి చనిపోయాడంటూ ఎవరో గుర్తు తెలియని వ్యక్తులు వాట్సాప్ గ్రూప్లో షేర్ చేశారు. ఆ న్యూస్ దావనంలా వ్యాప్తి చెందింది.ఇంకేముంది దుసాంగే కుటుంబ సభ్యులకు ఫోన్ చేస్తూ సంతాపాలు తెలుపుతున్నారు. ఇలా మెసేజ్లు, ఫోన్ కాల్స్ సంఖ్య పెరుగుతుండటంతో అతను పోలీసులను ఆశ్రయించాడు. తొలుత ఈ వార్తను అంతగా పట్టించుకోలేదు. తర్వాత నా స్నేహితులకు, బంధువులకు కూడా ఈ మెసేజ్లు రావడంతో వారు కొంత ఆందోళనకు లోనయ్యారు. ఈ విషయం మా కుటుంబ సభ్యులకు తెలిసి చాలా బాధపడ్డారు. ఇదంతా ఎవరు చేస్తున్నారో నాకు తెలియదు. అందుకే పోలీసులను ఆశ్రయించాను’ అని తెలిపాడు. అతని ఫిర్యాదుతో కేసు నమోదు చేసుకున్న పోలీసులు దర్యాప్తు చేపట్టారు.
