కొత్త ట్రాఫిక్ రూల్స్ తెలియకుండా రోడ్డెక్కితే..

సొంత వాహనం డ్రైవ్ చెయ్యడం ఇకపై అంత తేలిక కాదు. ముందు అసలు రూల్స్ ఏంటో బాగా తెలుసుకోవాలి. అవి తెలియకుండా రోడ్డెక్కితే.. ఏదో ఒక రూల్ కింద బుక్కైపోయే ప్రమాదం ఉంటుంది. ఎందుకంటే సెప్టెంబర్ 1 నుంచి కేంద్ర ప్రభుత్వం కొత్త ట్రాఫిక్ రూల్స్ తెచ్చింది. అంటే.. రూల్స్ పాతవే.. వాటిపై వేస్తున్న ఫైన్లు మాత్రం కొత్తవి. అందువల్ల రూల్స్‌పై పూర్తి అవగాహన ఉంటేనే ఫైన్ల నుంచి తప్పించుకోగలరు. సెప్టెంబర్ 1 నుంచి 63 నిబంధనలు అమల్లోకి వచ్చాయి. రోడ్డు ప్రమాదాల్ని తగ్గించేందుకు కేంద్ర రవాణా శాఖ భారీ ఫైన్లతో కొత్త చట్టాన్ని తీసుకొచ్చింది.

కొత్త మోటారు వాహనాల చట్టం ప్రకారం.. ట్రాఫిక్ నిబంధనలు పాటించని వారిపై ఐదు వందల నుంచి 10వేల వరకు జరిమానా, ఆరు నెలలపాటు జైలు శిక్ష విధించనున్నారు. డ్రైవింగ్ లైసెన్స్ రద్దు చేసే అవకాశం కూడా ఉంది. అంతేగాక, ద్విచక్ర వాహనంపై వెళ్లే నాలుగేళ్లలోపు పిల్లలూ హెల్మెట్ ధరించాల్సి ఉంటుంది. హెల్మెట్ ధరించకుండా ద్విచక్ర వాహనాలు నడిపితే వెయ్యి జరిమానా విధిస్తారు. నిర్ణీత వేగం కంటే ఎక్కువ వేగంతో వెళితే.. వెయ్యి నుంచి 2వేల వరకు ఫైన్‌ కట్టాల్సిందే. అంబులెన్స్, ఫైరింజన్లకు దారి ఇవ్వకపోతే 10వేలు జరిమానా విధిస్తారు.

అనర్హత వేటుపడిన డ్రైవర్ వాహనం నడిపితే 10వేలు జరిమానా తప్పదు. నిర్ణీత సంఖ్య కంటే ఎక్కువ మంది ప్రయాణికులను ఎక్కించుకునే వాహనాలకు ఒక్కో ప్రయాణికుడిపై రెండు వందల చొప్పున జరిమానా విధించడం జరుగుతుంది. ఇక... సీటు బెల్టు ధరించని డ్రైవర్లకు వెయ్యి జరిమానా పడుద్ది. మద్యం మత్తులో వాహనం నడిపితే 10 వేలు ఫైన్‌ కట్టాల్సిందే. డ్రైవింగ్ లైసెన్సు లేకుండా వాహనం నడిపితే 5 వేలు ఫైన్ విధిస్తారు. రాంగ్ రూట్‌లో వెళితే 5వేలు, ప్రమాదకరంగా నడిపితే 5వేలు, పర్మిట్ లేని వాహనానికి 10 వేల వరకు జరిమానా తప్పదు. ట్రిబుల్‌ డ్రైవింగ్ చేస్తే 5 వేలు, సెల్‍‌ఫోన్ డ్రైవింగ్ చేస్తే 5 వేలు కట్టాల్సిందే. మైనర్‌ డ్రైవింగ్‌ చేస్తే 25వేలకు వరకు సంరక్షకులకు జరిమానా, మూడేళ్ల జైలు శిక్ష పడుతుంది.