గొర్రె ఎంత పని చేసింది.. అందరూ చూస్తుండగానే..
సరదాగా చేసిందో లేక కావాలనే చేసిందో తెలియదు కానీ ఓ గొర్రె చేసిన పని ఇప్పుడు సోషల్ మీడియాలో వైరల్గా మారింది. షూట్కు సిద్దమవుతున్న వైల్డ్లైఫ్ ఫొటోగ్రాఫర్ను అది తన కొమ్ములతో కుమ్మేసింది. దాని దెబ్బకు కెమెరామెన్ కింద పడిపోయి అబ్బా అని అనాల్సి వచ్చింది. ఈ సంఘటన నైరుతి ఇంగ్లండ్లోని వైల్ట్షైర్ జంతువుల పార్కులో చోటుచేసుకుంది. "వన్యప్రాణుల జీవితంలోని అనూహ్య దృశ్యాల ఆవిష్కరణ" పేరుతో ప్రముఖ మీడియా సంస్థ బీబీసీ ఓ కార్యక్రమాన్ని రూపొందిస్తున్నది. ఇందులో భాగంగా సోమవారం వైల్ట్షైర్లోని పార్కులోని జంతువులను చిత్రీకరించేందుకు ఛానల్ టీం అక్కడికి వెళ్ళింది. ముందుగా అక్కడ ఉన్న సిసిల్ అనే గొర్రె గురించి నిర్వాహుకులను అడిగి తెలుసుకుంటోంది ఆ టీమ్. అది చాలా మొండిదని, ఎవరైనా తనకు నచ్చని పనిచేస్తే వెంటనే వాళ్ల పనిపడుతుందని సిబ్బంది వివరిస్తున్నారు. ఈ క్రమంలో దానిని కెమెరాలో బంధించడానికి బీబీసీ కెమెరామెన్ సిద్దమవుతున్న సమయంలో అది నెమ్మదిగా అతని దగ్గరకు వెళ్ళి కోమ్ములతో విరుచుకుపడింది. దీంతో అక్కడ ఉన్నవారు ఒక్కసారిగా హతాశులయ్యారు. చివరకు పార్కు నిర్వాహకులు కలుగజేసుకుని దాన్ని పిలవడంతో అది శాంతించి వెనక్కి వచ్చింది. ఈ తతంగాన్నంతా పక్కనే ఉండి గమనిస్తున్న వారంతా నవ్వడంతో కెమెరామెన్ బిక్కముఖం వేయాల్సి వచ్చింది.
© Copyright 2024 : tv5news.in. All Rights Reserved. Powered by hocalwire.com