జీఎస్టీ రేట్లు పెంచే ఆలోచనలో కేంద్రం?

రెవెన్యూ లోటుతో కేంద్రం సతమతమవుతున్న నేపథ్యంలో జీఎస్టీ రేట్లు పెరిగే సూచనలు కనిపిస్తున్నాయి. శ్లాబులను కుదించే అవకాశాన్ని పరిశీలిస్తున్నారు. వచ్చే వారం జరిగే జీఎస్టీ మండలి సమావేశంలో ఈ మేరకు నిర్ణయం తీసుకోనున్నట్లు తెలుస్తోంది. ఆర్ధిక మంత్రి నిర్మలా సీతారామన్ నేతృత్వంలో జీఎస్టీ మండలి సమావేశంలో ఈ నెల 18న జరగనుంది. ఓ వైపు జీఎస్టీ వసూళ్లు తగ్గుముఖం పట్టడం, రాష్ట్రాలకు చెల్లించాల్సిన పరిహారం బకాయి పడటం వంటి పరిస్థితుల్లో ఈ సమావేశానికి ప్రాధాన్యం ఏర్పడింది. ప్రస్తుతం జీఎస్టీలో 5, 12, 18, 28 శాతం చొప్పున నాలుగు శ్లాబులున్నాయి. కొన్నింటిపై జీఎస్టీ రేటుకు తోడు.. సెస్‌ సైతం విధిస్తున్నారు.

ప్రస్తుతమున్న జీఎస్టీ రేటును 5 శాతం నుంచి 8 శాతానికి, 12 శాతంగా ఉన్న రేటును 15శాతానికి పెంచాలని భావిస్తోంది కేంద్రం. ఈ రేట్ల హేతు బద్దీకరణకు సంబందించి జీఎస్టీ మండలి సమావేశంలో ప్రజంటేషన్‌ కూడా ఇవ్వనున్నట్లు తెలుస్తోంది. అలాగే పలు వస్తువులపై విధిస్తున్న సెస్‌ను కూడా పెంచనున్నట్లు సమాచారం. ప్రస్తుతమున్న నాలుగు శ్లాబులను మూడుకు కుదించే అంశాన్ని జీఎస్టీ మండలి పరిశీలిస్తున్నట్లు తెలుస్తోంది.