ఫిల్మ్ న్యూస్‌క్యాస్ట‌ర్స్‌ అసోసియేష‌న్‌కు అల్లు అర్జున్ అభినందన.. రూ.10 లక్షల ఆర్థిక సహాయం
'అల... వైకుంఠపురంములో' చిత్రంతో ఆల్ టైమ్ నాన్ బాహుబలి ఇండస్ట్రీ రికార్డులు నెలకొల్పిన స్టైలిష్ స్టార్ అల్లు అర్జున్‌ను బుధవారం 'ఫిల్మ్ న్యూస్‌క్యాస్ట‌ర్స్‌ అసోసియేషన్ ఆఫ్ ఎలక్ట్రానిక్ మీడియా' ప్రెసిడెంట్ వి. లక్ష్మీనారాయణ, వైస్ ప్రెసిడెంట్ వై. జె. రాంబాబు, జనరల్ సెక్రటరీ నాయుడు సురేంద్ర కుమార్, జాయింట్ సెక్రటరీ జి. శ్రీనివాస్ కుమార్, ట్రెజరర్ జి. జలపతి, ఎగ్జిక్యూటివ్ మెంబర్స్ పి. రఘు, వై. రవిచంద్ర, కె. ఫణి, వి. శ్రీనివాస రావు, జి. శ్రీనివాస్ తదితరులు కలిశారు. సినిమా భారీ విజయం సాధించిన సందర్భంగా ఆయనను అభినందించారు.
మాటల సందర్భంగా జర్నలిస్టుల సంక్షేమానికి 'ఫిల్మ్ న్యూస్‌ క్యాస్ట‌ర్స్‌ అసోసియేషన్ ఆఫ్ ఎలక్ట్రానిక్ మీడియా' చేస్తున్న కార్యక్రమాలను తెలుసుకున్న స్టైలిష్ స్టార్ అల్లు అర్జున్.. ఎంతో మంచి పని చేస్తున్నారని సంతోషం వ్యక్తం చేశారు. వెంటనే తన వంతుగా 10 లక్షల రూపాయలను ఆర్థిక సహాయంగా అందించారు. అయితే.. తాము వచ్చింది అభినందించడానికి మాత్రమేనని, ఆర్థిక సహాయం కోరడానికి కాదని అసోసియేషన్ ప్రతినిధులు అల్లు అర్జున్ గారితో చెప్పగా.. "మీరు చేస్తున్న పనులు నాకు బాగా నచ్చాయి. ఇది టోకెన్ ఆఫ్ అప్రిసియేషన్ అమౌంట్ మాత్రమే.. ఇకముందు కూడా మీకు సహాయం చేస్తాను" అని ఆయన అన్నారు. తన పెద్ద మనసును చాటుకున్నారు. ఈ సందర్భంగా అల్లు అర్జున్ గారు మాట్లాడుతూ.. "జర్నలిస్టుల ఆరోగ్య భద్రత, సంక్షేమం, ఇతర కార్యక్రమాల కోసం 'ఫిల్మ్ న్యూస్‌క్యాస్ట‌ర్స్‌ అసోసియేషన్ ఆఫ్ ఎలక్ట్రానిక్ మీడియా' చేస్తున్న కృషి ప్రశంసనీయమని కొనియాడారు. మంచి పనులు చేస్తున్నారని.. ఈ సంస్థ చేస్తున్న సేవా కార్యక్రమాలు నాకు ఎంతగానో నచ్చాయని ఆనందించారు. అందుకని, నా వంతుగా కొంత సహాయం చేస్తున్నానని.. భవిష్యత్తులోనూ అండగా ఉంటానని హామీ ఇచ్చారు. జర్నలిస్టులపై నాకెంతో గౌరవం ఉందని అల్లు అర్జున్ తెలిపారు. మా సినిమాలను అభిమానులు, ప్రేక్షకుల్లోకి తీసుకు వెళ్ళేది జర్నలిస్టులే. వాళ్ల సంక్షేమంలో నేను భాగం కావడం సంతోషంగా ఉందని అన్నారు. జర్నలిస్టులకు ఏ సహాయం కావలసిన నేను ముందుంటానని.. మీరు అందరూ సమిష్టిగా పని చేయాలని కోరుకుంటున్నానని అన్నారు. మీరందరూ ఒకే తాటిపైకి రావాలని..మీకున్న పవర్ చాలా పెద్దదని అన్నారు. ఇండస్ట్రీలో ఎటువంటి డిఫరెన్స్ లేకుండా మీరంతా ఒకటే అని చూపించాలి" అని అల్లు అర్జున్ సూచించారు.
