అందం, అభినయం కలబోసుకున్న అర్చన (వేద) త్వరలో పెళ్లి పీటలు ఎక్కనుంది. తనను మెచ్చిన తనకు నచ్చిన వరుడు జగదీశ్‌ను వివాహం చేసుకోబోతోంది. గత కొంత కాలంగా వీరిద్దరూ ప్రేమలో ఉన్నారు. త్వరలోనే శుభవార్త చెబుతానంటూ ఆ మధ్య అర్చన అభిమానులకు హింట్ ఇచ్చింది. వ్యాపారవేత్త జగదీశ్ భక్తవత్సలంతో అర్చన నిశ్చితార్థం గురువారం హైదరాబాద్‌లో ఘనంగా జరిగింది. ఈ వేడుకకు పలువురు సినీ ప్రముఖులు హాజరై అర్చన-జగదీశ్‌లకు శుభాకాంక్షలు అందజేశారు. బిగ్‌బాస్ సీజన్1 అర్చనతో పాటు పాల్గొన్న శివ బాలాజీ, నవదీప్‌లు ఈ వేడుకలో ప్రత్యేక ఆకర్షణగా నిలిచారు. 2004లో నేను సినిమాతో తెరంగేట్రం చేసిన అర్చన.. కన్నడ, మళయాళం, తమిళ సినిమాల్లోనూ నటించింది. మంచి డ్యాన్సర్ అయిన అర్చన సినిమాల్లో హీరోయిన్‌గా రాణించలేకపోయింది. పలు డ్యాన్స్‌షో లకు ఆమె న్యాయనిర్ణేతగా వ్యవహరించింది.
