MAMMUTTY: మమ్ముట్టి పేరుకి నిజమైన కథ ఇదే!

మలయాళ సూపర్‌స్టార్‌ మమ్ముట్టి అసలు పేరు మహమ్మద్ కుట్టి అన్న విషయం అభిమానులకు తెలిసిందే. కానీ ‘మమ్ముట్టి’ అనే పేరు ఎలా వచ్చిందనే ఆసక్తికర ప్రశ్నకు ఇప్పుడు స్వయంగా ఆయన సమాధానం చెప్పారు. కేరళలో జరిగిన ఒక కార్యక్రమంలో కాలేజీ రోజుల జ్ఞాపకాలను పంచుకుంటూ, తన పేరులో జరిగిన మార్పు వెనక ఉన్న అసలు కథను వెల్లడించారు. ఆయన మాట్లాడుతూ, “కాలేజీలో ఉన్నప్పుడు అందరితో నా పేరు ఒమర్ షరీఫ్ అని చెప్పేవాడిని. నా అసలు పేరు మహమ్మద్ కుట్టి అని ఎవరికీ తెలియదు. ఒకరోజు ఐడీ కార్డు మర్చిపోయాను. అప్పుడు అందరికీ నిజం తెలిసిపోయింది” అని చిరునవ్వుతో గుర్తుచేసుకున్నారు.

అప్పుడే ఒక స్నేహితుడు తన అసలు పేరును పొరపాటున ‘మహమ్మద్ కుట్టి’ బదులు ‘మమ్ముట్టి’ అని చదివాడట. అదే పేరు వెంటనే కాలేజీలో వ్యాపించి, తర్వాత ఆయనకు స్థిరంగా మారిపోయింది. ఈ పేరును పెట్టిన తన స్నేహితుడు శశిధరన్ అని మమ్ముట్టి పరిచయం చేశారు. తన పేరు ఎలా మారిందన్న విషయంలో మీడియా ఎన్నో కథనాలు రాసిందని, కానీ అసలు నిజం ఇదేనని ఆయన చెప్పారు. ఇన్ని రోజులు ఈ కథను బయటపెట్టకుండా ఉంచినట్లు తెలిపారు. దీనితో సంవత్సరాలుగా కొనసాగుతున్న ఊహాగానాలకు తెరదిగింది.

1971లో సినీ రంగంలోకి అడుగుపెట్టిన మమ్ముట్టి ఇప్పటివరకు 420కు పైగా చిత్రాలలో నటించారు. ప్రస్తుతం జితిన్ దర్శకత్వంలో తెరకెక్కుతున్న క్రైమ్ యాక్షన్ థ్రిల్లర్ ‘కళంకావల్’ చిత్రంలో నటిస్తున్నారు.