Chandigarah: 13 ఏళ్లుగా కోమాలో.. కారుణ్య మరణం కోసం సుప్రీంను ఆశ్రయించిన కుటుంబం..

నిర్జీవంగా పడి ఉన్న ఆ కొడుకుని 13 సంవత్సరాలుగా చూస్తున్నారు.. సాధారణ స్థితికి వస్తాడన్న ఆశ చచ్చిపోయింది. అతడికి సపర్యలు చేసే ఓపిక కూడా లేకపోయింది ఆ తల్లిదండ్రులకు. అందుకే మనసుని రాయి చేసుకుని కొడుకుకి కారుణ్య మరణం ప్రసాదించమని సుప్రీం కోర్టును ఆశ్రయించారు. 

హరీష్ రాణాను కారుణ్య మరణానికి అనుమతించాలా వద్దా అని సుప్రీంకోర్టు నిర్ణయించనుంది. తుది నిర్ణయం తీసుకునే ముందు జనవరి 13న రాణా తల్లిదండ్రుల నుండి కోర్టు వాదనలు వింటుంది.

కోర్టు తుది నిర్ణయం కోసం సిద్ధమవుతోంది

ఈ విషయాన్ని న్యాయమూర్తులు జె.బి. పార్దివాలా, కె.వి. విశ్వనాథన్ లతో కూడిన ధర్మాసనం విచారించి, నిర్ణయాత్మక తీర్పు ఇవ్వాల్సిన సమయం ఆసన్నమైందని సూచించింది. రోగిని వివరంగా పరీక్షించిన న్యూఢిల్లీలోని ఎయిమ్స్ నుండి వచ్చిన సెకండరీ మెడికల్ బోర్డు నివేదికను న్యాయవాది రష్మి నందకుమార్ మరియు అదనపు సొలిసిటర్ జనరల్ ఐశ్వర్య భాటి అధ్యయనం చేయాలని కోర్టు ఆదేశించింది. ఈ నివేదికలో హరీష్ రాణా వైద్య చరిత్ర, రోగ నిర్ధారణ ఫలితాలు, ఇతర సంబంధిత  అం శాలు పరిశీలనలో ఉన్నాయి.

కుటుంబాన్ని పరిశీలించి, ఆ పరిశోధనలను కోర్టుకు సమర్పించడంలో వారి సహాయం అవసరమని బెంచ్ న్యాయవాదికి తెలిపింది. "ఇది చాలా విచారకరమైన నివేదిక, ఇది మాకు పెద్ద సవాలుగా ఉంటుంది అని కోర్టు పేర్కొంది.

రానా తల్లిదండ్రులు, తోబుట్టువులను జనవరి 13న కోర్టులో విచారణకు హాజరు కావాలని సమన్లు ​​జారీ చేశారు.

పాసివ్ యుథనేషియా కోసం విధానం

ప్రస్తుత మార్గదర్శకాల ప్రకారం, పాసివ్ యుథనేషియాకు చికిత్సను ఉపసంహరించుకోవడానికి ప్రాథమిక, ద్వితీయ వైద్య బోర్డులు రెండూ అంగీకరించాలి. తుది నిర్ణయం వైద్య అంచనాల ద్వారా, రోగి కుటుంబ న్యాయవాది ద్వారా  తెలియజేయబడుతుందని సుప్రీంకోర్టు నొక్కి చెప్పింది.

కేసు నేపథ్యం

హరీష్ రాణా 2013లో చండీగఢ్‌ యూనివర్శిటీలో ఇంజనీరింగ్ చదువుతున్నప్పుడు నాల్గవ అంతస్తు బాల్కనీ నుండి పడిపోవడంతో  అతడి తలకు తీవ్ర గాయమైంది. అప్పటి నుండి, అతను అస్వస్థతగానే ఉన్నాడు. PGI చండీగఢ్, AIIMS ఢిల్లీ, రామ్ మనోహర్ లోహియా హాస్పిటల్, లోక్ నాయక్ జై ప్రకాష్ నారాయణ్ హాస్పిటల్ మరియు ఫోర్టిస్ హాస్పిటల్‌లలో విస్తృత చికిత్స అందించినప్పటికీ, ఎటువంటి మార్పు కనిపించలేదు. 

కుటుంబం సంవత్సరాలుగా ఇంట్లోనే అతనిని చూసుకుంటోంది. అత్యవసర సహాయం కోసం ఒక నర్సును కూడా నియమించుకుంది. అయితే, దీర్ఘకాలిక వైద్య సంరక్షణ ఇంటిపై భారీ ఆర్థిక భారాన్ని మోపింది. గతంలో కారుణ్య మరణం కోసం దాఖలు చేసిన పిటిషన్లను సుప్రీంకోర్టు 2018లో ఒకసారి, 2023లో మరోసారి తిరస్కరించింది. ఈ మూడవ పిటిషన్ కోలుకునే ఆశ లేదని వైద్యలు అందించిన నివేదికను అనుసరించి సుప్రీం తీర్పు నిర్ణయిస్తుంది.