Delhi: ఎర్రకోట పేలుళ్లలో యూపీ వ్యాపారి మృతి.. వస్తువులు కొనడానికని వచ్చి..

సోమవారం సాయంత్రం దేశ రాజధానిని కుదిపేసిన ఎర్రకోట పేలుడులో మరణించిన వారిలో ఉత్తరప్రదేశ్‌లోని షామ్లి జిల్లాకు చెందిన 22 ఏళ్ల వ్యక్తి కూడా ఉన్నాడు. బాధితుడిని నౌమాన్ గా గుర్తించారు. అతను షామ్లీలోని జింఝానకు చెందినవాడు. తన వ్యాపారం కోసం సౌందర్య సాధనాలను కొనుగోలు చేయడానికి ఢిల్లీకి వచ్చి పేలుళ్లకు బలయ్యాడు. 

ఈ వార్తతో కుప్పకూలిన అతని కుటుంబం మంగళవారం ఉదయం లోక్ నాయక్ జై ప్రకాష్ నారాయణ్ (ఎల్ఎన్జెపి) ఆసుపత్రికి చేరుకుంది. ఈ పేలుడు సమయంలో నౌమాన్ తోడుగా ఉన్న అతని బంధువు 21 ఏళ్ల అమన్ కూడా గాయపడ్డాడు.

ఈ భారీ కారు పేలుడు తీవ్ర బాధ, ఆగ్రహాన్ని మిగిల్చింది. సోమవారం సాయంత్రం, గౌరీ శంకర్ ఆలయం నుండి బైక్‌పై తిరిగి వస్తున్న 28 ఏళ్ల అంకుష్ శర్మ మరియు 20 ఏళ్ల రాహుల్ కౌశిక్ లు సాయంత్రం 6:52 గంటలకు జరిగిన పేలుడులో చిక్కుకున్నారు. సమీపంలోని హ్యుందాయ్ i20 నుండి వచ్చిన పేలుడు అంకుష్‌ను కారుపైకి విసిరివేసింది. ఫలితంగా అతని ముఖం, శరీరం 80% కాలిన గాయాలయ్యాయి.

రాహుల్ తీవ్ర గాయాలతో ఆస్పత్రిలో చికిత్స పొందుతున్నాడు. LNJP ఆసుపత్రి వెలుపల, బాధితుల కుటుంబాలు గుమిగూడి, తప్పిపోయిన వారి కోసం వెతుకుతూ, గాయపడిన వారి గురించి సమాచారం కోసం ఎదురు చూడడం వంటి పరిణామాలతో  గందరగోళం అలుముకుంది. 

సోమవారం సాయంత్రం 6:52 గంటలకు జరిగిన ఈ పేలుడులో తొమ్మిది మంది మృతి చెందగా, 20 మంది గాయపడ్డారు. హర్యానా రిజిస్ట్రేషన్ నంబర్ కలిగిన నెమ్మదిగా కదులుతున్న హ్యుందాయ్ ఐ20 కారు ఎర్రకోట సమీపంలోని ట్రాఫిక్ స్టాప్ వద్ద పేలడంతో సమీపంలోని అనేక వాహనాలు దెబ్బతిన్నాయి.

రోడ్డుపై ఛిద్రమైన మృతదేహాలు కనిపించాయని ప్రత్యక్ష సాక్షులు వివరించారు. ఢిల్లీ పోలీసులు ఈ పేలుడును అనుమానిత ఉగ్రవాద దాడిగా పరిగణించి చట్టవిరుద్ధ కార్యకలాపాల (నివారణ) చట్టం (UAPA) కింద కేసు నమోదు చేశారు. ఫోరెన్సిక్ ఆధారాలు, నిఘా సమాచారం ప్రకారం ఉగ్రవాద సంబంధాలను సూచించినట్లు దర్యాప్తు అధికారులు తెలిపారు.

హర్యానాలోని ఫరీదాబాద్‌లో అధికారులు ఢిల్లీకి కేవలం 50 కిలోమీటర్ల దూరంలో 2,900 కిలోల పేలుడు పదార్థాలను స్వాధీనం చేసుకున్న రోజే ఈ సంఘటన జరిగింది.