Karnataka: భర్త , అత్తమామలు బలవంతంగా వ్యభిచారంలోకి.. మహిళ ఆత్మహత్య..

కట్టుకున్న భర్త, అత్తమామలు ఆమె పాలిట రాక్షసులుగా మారారు. 22ఏళ్ల యువతి జీవితాన్ని బుగ్గిపాలు చేశారు. బలవంతంగా వ్యభిచార కూపంలోకి దింపడంతో బలవన్మరణానికి పాల్పడింది. 

కర్ణాటక బీదర్ జిల్లా భాల్కీకి చెందిన అంజనాబాయి శేఖర్ పాటిల్ బసవకళ్యాణ్‌లోని తన ఇంట్లో శవమై కనిపించారు. ఆమె 2022లో బసవకళ్యాణ్‌కు చెందిన శేఖర్ పాటిల్‌ను వివాహం చేసుకుంది. వారికి 11 నెలల పాప కూడా ఉంది. 

అంజనాబాయి మృతదేహం ఇంట్లో వేలాడుతూ కనిపించింది. ఆమె తండ్రి విజయ్ కుమార్ ఇచ్చిన వాంగ్మూలాల ఆధారంగా, ఆమె అత్తమామలు తన కూతురిని మానసిక, శారీరక వేధింపులకు గురిచేశారని, వారు ఆమెను వ్యభిచారంలోకి నెట్టివేశారని ఆరోపించారు. తీవ్ర మానసిక వేధనకు గురిచేశారని ఆరోపిస్తూ పోలీసులకు ఫిర్యాదు చేయడంతో ఈ మేరకు కేసు నమోదు చేశారు.

అక్రమ సంబంధాలను నిరాకరించినందుకు తన కుమార్తెపై దాడి చేశారని విజయ్‌కుమార్ ఆరోపించారు. స్థానిక పోలీసులు ఇప్పుడు శేఖర్ పాటిల్ సహా ముగ్గురు నిందితులపై కేసు నమోదు చేశారు. మిగతా ఇద్దరు కుటుంబసభ్యులు సహా ముగ్గురు నిందితులు కస్టడీలో ఉన్నారు. కేసు దర్యాప్తు జరుగుతోంది.