ICC: విశ్వ విజేత న్యూజిలాండ్
తొలిసారి టీ 20 ప్రపంచకప్ సాధించిన కివీస్.. ఆల్‌రౌండ్‌ ప్రదర్శనతో దక్షిణాఫ్రికా చిత్తు;
ఐసీసీ మహిళల టీ20 ప్రపంచ కప్‌ 2024 విజేతగా న్యూజిలాండ్ నిలిచింది. ఫైనల్‌లో దక్షిణాఫ్రికాపై 32 పరుగుల తేడాతో గెలిచింది. తొలుత బ్యాటింగ్ చేసిన న్యూజిలాండ్ నిర్ణీత 20 ఓవర్లలో 5 వికెట్ల నష్టానికి 158 పరుగులు చేసింది. ఈ లక్ష్య ఛేదనలో దక్షిణాఫ్రికా 20 ఓవర్లలో 9 వికెట్లు కోల్పోయి 126 పరుగులకే పరిమితమైంది. కాగా, కివీస్ టీ20 ప్రపంచకప్‌ను సాధించడం ఇదే తొలిసారి.
కివీస్ భారీ స్కోరు
ఈ మ్యాచ్‌లో తొలుత బ్యాటింగ్ చేసిన న్యూజిలాండ్ నిర్ణీత 20 ఓవర్లలో అయిదు వికెట్ల నష్టానికి 158 పరుగులు చేసింది. అంచనాలు లేకుండా బరిలోకి దిగి న్యూజిలాండ్ అద్భుతం చేసింది. తొలుత బ్యాటింగ్‌కు దిగిన కివీస్..సమిష్టి ప్రదర్శనతో ఆకట్టుకుంది. 16 పరుగులకే జార్జియా(9) వికెట్ కోల్పోయిన కివీస్..బేట్స్‌, కెర్ బ్యాటింగ్‌తో గాడిలో పడింది. వీరిద్దరు సఫారీ బౌలింగ్‌ దాడిని సమర్థంగా నిలువరిస్తూ పరుగులు కొల్లగొట్టారు. రెండో వికెట్‌కు వీరిద్దరు కలిసి 37 పరుగులు జోడించారు. కెప్టెన్‌ డివైన్‌(6) నిరాశపరిచినా..బ్రూక్‌తో కలిసి కెర్ ఇన్నింగ్స్‌ను మళ్లీ చక్కదిద్దింది. సమయోచిత ఆటతీరుతో స్కోరుబోర్డుకు కీలక పరుగులు జతచేసింది. 14 పరుగుల తేడాతో వీరద్దరు ఔటైనా కివీస్ పోరాడే స్కోరు అందుకుంది. కివీస్ బ్యాటర్లలో అమేలియా కెర్ (43; 38 బంతుల్లో 4 ఫోర్లు), బ్రూక్ హాలిడే (38; 28 బంతుల్లో 3 ఫోర్లు), సుజీ బేట్స్‌ (32; 31 బంతుల్లో 3 ఫోర్లు) రాణించారు. దక్షిణాఫ్రికా బౌలర్లలో ఎంలాబా 2, ఆయబొంగ ఖాకా, ట్రయాన్, నాడిన్ డి క్లర్క్ తలో వికెట్ పడగొట్టారు.
లక్ష్యఛేదనలో తడబాటు
ఆ తర్వాత లక్ష్యఛేదనకు దిగిన దక్షిణాఫ్రికా 20 ఓవర్లలో 126/9 స్కోరుకు పరిమితమైంది. అమెలియా కెర్ (3/24), రోసిమెరీ(3/25) మూడు వికెట్లతో సఫారీల పతనాన్ని శాసించారు. కెప్టెన్‌ లారా వోల్వార్డ్‌(33) మినహా అందరూ ఘోరంగా విఫలమయ్యారు. ఛేదనలో తొలుత దూకుడుగా ఆడిన దక్షిణాఫ్రికా..లారా నిష్క్రమణ తర్వాత వరుస విరామాల్లో వికెట్లు కోల్పోయి మరోమారు తాము చోకర్స్‌ అని చేతల్లో చూపెట్టింది. అమెలియా కెర్‌కు ‘ప్లేయర్‌ ఆఫ్‌ ద మ్యాచ్‌’తో పాటు ‘ప్లేయర్‌ ఆఫ్‌ ద టోర్నీ’ దక్కించుకుంది. 2009, 2010లో రన్నరప్‌గా నిలిచిన న్యూజిలాండ్ ఎట్టకేలకు 14 ఏండ్ల తర్వాత తమ చిరకాల కలను సాకారం చేసుకుంది.