దులీప్‌ ట్రోఫీలో ఇండియా- ఏ జట్టు ఘన విజయం సాధించింది. అనంతపురంలో ఇండియా- డీతో జరిగిన మ్యాచ్‌లో ఇండియా ఏ జట్టు 186 పరుగుల భారీ తేడాతో ఘన విజయం సాధించింది. రిక్కీ భుయ్ విరోచిత సెంచరీతో పోరాడినా ఇండియా డీ జట్టుకు ఓటమి తప్పలేదు. ఇండియా ఏ నిర్దేశించిన 488 పరుగుల విజయలక్ష్యంతో బరిలో దిగిన ఇండియా -డీ జట్టు 301 పరుగులకే పరిమితమైంది. ఓవర్‌నైట్‌ స్కోర్‌ 62/1తో ఇన్నింగ్స్ ఆరంభించిన ఇండియా డీ జట్టు.. లక్ష్య ఛేదనలో బాగానే పోరాడింది. ఆరంభంలో యశ్ దుబే, రిక్కీ భుయ్ లు నెమ్మదిగా పరుగులు రాబట్టే ప్రయత్నం చేశారు. రిక్కీ భుయ్ 195 బంతులు ఎదుర్కొని 14 బౌండరీలు, 3 భారీ సిక్సర్ల సహాయంతో 113 పరుగులు చేశాడు. దుబే 94 బంతుల్లో 5 బౌండరీల సహాయంతో 37 పరుగులు చేసి రనౌట్‌ అయ్యాడు. శ్రేయస్‌ అయ్యర్‌ 41 పరుగులు చేసి అవుటయ్యాడు. శ్రేయస్‌ అవుటయ్యాక వికెట్‌ కీపర్‌ సంజు సామ్సన్, రిక్కీ భుయ్ లు కాసేపు అలరించారు. ఓ వైపు వికెట్లు పడుతున్నా.. రిక్కీ భుయ్ దూకుడు తగ్గలేదు. చూడచక్కని షాట్లతో అందరినీ అలరించాడు. సౌరభ్‌కుమార్‌ 22, హర్షిత్‌ రాణా 24 పరుగులు చేశారు. ఇండియా ఏ బౌలర్లలో సామ్స్‌ ములానీ 3, తనుష్‌ కొటియన్‌ 4, రియన్‌ పరాగ్, ఖలీల్‌ అహ్మద్‌ చెరో వికెట్‌ తీసుకున్నారు.
మరో మ్యాచ్ డ్రా
ఓవర్‌నైట్‌ స్కోర్‌ 309/7తో ప్రారంభించిన ఇండియా బీ జట్టు తొలి ఇన్నింగ్స్‌లో 108 ఓవర్లలో 332 పరుగులకు ఆలౌట్‌ అయ్యింది. దీంతో ఇండియా సీ జట్టుకు 193 పరుగుల మొదటి ఇన్నింగ్స్ ఆధిక్యత లభించింది. ఇండియా బీ జట్టు కెప్టెన్‌ అభిమన్యు ఈశ్వరన్‌ 286 బంతుల్లో 157 (14 ఫోర్లు, సిక్సర్‌) పరుగులు చేశాడు. ఇండియా సీ బౌలర్ అన్షుల్‌ కాంబోజ్‌ 27.5 ఓవర్లలో 69 పరుగులిచ్చి 8 వికెట్లు పడగొట్టాడు. విజయకుమార్‌ వైశాక్, మయాంక్‌ మార్ఖండే చెరో వికెట్‌ తీసుకున్నారు. అనంతరం ఇండియా సీ జట్టు రెండో ఇన్నింగ్స్‌లో 128/4 పరుగుల వద్ద డిక్లేర్డ్‌ చేసింది. జట్టు కెప్టెన్‌ రుతురాజ్‌ గైక్వాడ్‌ 93 బంతుల్లో 8 ఫోర్లు, సిక్సర్‌ సహాయంతో 62 పరుగులు (అర్ధసెంచరీ) సాధించాడు. రజత్‌ పటీదార్‌ 84 బంతుల్లో 5 ఫోర్ల సహాయంతో 42 పరుగులు చేశాడు. ఇండియా బీ బౌలర్లలో రాహుల్‌ చాహర్‌ 2, ముకేష్‌కుమార్, ముషీర్‌ ఖాన్‌ చెరో వికెట్‌ తీసుకున్నారు.ఇండియా -సీ, బీ జట్ల మధ్య జరిగిన మ్యాచ్ డ్రాగా ముగిసింది. 8 వికెట్లతో పాటు 38 పరుగులు సాధించిన అన్షుల్‌ కాంబోజ్‌ ప్లేయర్‌ ఆఫ్‌ ద మ్యాచ్‌గా ఎన్నికయ్యాడు.