ASHWIN: క్రికెట్ చరిత్రలో ముగిసిన అశ్విన్ శకం
అంతర్జాతీయ క్రికెట్ కు రిటైర్ మెంట్ ప్రకటించిన అశ్విన్... దిగ్గజ బౌలర్ గా ఎదిగిన స్పిన్ మాంత్రికుడు;
ప్రపంచ క్రికెట్ చరిత్రలో మరో శకం ముగిసింది. బంతితో అద్భుతాలు చేసే మేధావి రవిచ్రందన్ అశ్విన్ క్రికెట్ కు వీడ్కోలు పలికాడు. మొత్తం 106 టెస్టు మ్యాచ్ లు ఆడిన అశ్విన్..537 వికెట్లు తీసి దిగ్గజ బౌలర్లలో ఒకడిగా ఖ్యాతి గడించాడు. 2010లో శ్రీలంకపై వన్డేల్లో, 2011లో వెస్టిండీస్ తో టెస్టుల్లో అశ్విన్ అరంగ్రేటం చేశాడు. టెస్టుల్లో 6 సెంచరీలు,14 హాఫ్ సెంచరీలతో 3503 పరుగులు చేశాడు. ఆడిలైడ్ లో అశ్విన్ తన చివరి టెస్టు మ్యాచ్ ఆడాడు.
ఆకస్మిక నిర్ణయం
ఆస్ట్రేలియాతో జరిగిన మూడో టెస్టు తర్వాత ఈ నిర్ణయాన్ని ప్రకటించి అశ్విన్ అందరినీ షాక్ కు గురిచేశాడు. అద్భుతమైన విజయాల్లో కీలక పాత్ర పోషించి భారత్ క్రికెట్ చరిత్రపై చెరగని సంతకం పెట్టిన అశ్విన్.. అద్భుతమైన కెరీర్‌ను ముగించాడు. భారత క్రికెట్ చరిత్రలో అత్యుత్తమ ఆల్ రౌండర్‌లలో ఒకడిగా అశ్విన్ ఖ్యాతి గడించాడు. అసాధారణమైన స్పిన్ బౌలింగ్, తెలివైన బంతులు.. అచంచలమైన అంకితభావం.. అశ్విన్ ను గొప్ప ఆటగాడిగా నిలబెట్టాయి. 2010లో అతని అంతర్జాతీయ క్రికెట్ లో అరంగేట్రం చేసిన అశ్విన్... జింబాబ్వేలో జరిగిన ట్రై-సిరీస్ సందర్భంగా మొదటగా భారత జెర్సీని ధరించాడు, జూన్ 5, 2010న శ్రీలంకతో జరిగిన వన్డేలో అరంగేట్రం చేశాడు. ఆ మ్యాచ్‌లో 32 బంతుల్లో 38 పరుగులు చేయడమే కాక... రెండు కీలక వికెట్లు తీశాడు. అప్పుడు ప్రారంభమైన అశ్విన్ ప్రయాణం.. ఎన్నో విజయాల్లో పాత్ర పోషించేలా చేసింది.
బ్యాటర్ నుంచి బౌలర్ గా ఎదిగిన అశ్విన్
1986 సెప్టెంబరు 17న చెన్నైలో జన్మించిన అశ్విన్ బ్యాటింగ్‌పై మక్కువతో క్రికెట్ ప్రయాణం మొదలు పెట్టాడు. తండ్రి, రవిచంద్రన్ క్లబ్-స్థాయి ఫాస్ట్ బౌలర్. తండ్రి ప్రోత్సాహంతో అశ్విన్ ఓపెనింగ్ బ్యాటర్ గా తన క్రికెట్ ప్రస్థానాన్ని ప్రారంభించాడు. భారత అండర్-17 జట్టుకు కూడా ప్రాతినిధ్యం వహించాడు. చెన్నైలోని పద్మ శేషాద్రి బాల భవన్, సెయింట్ బేడేస్ స్కూల్‌లో చదివిన అశ్విన్.. స్కూల్ క్రికెట్ లో తిరుగులేని ఆటతో అద్భుతాలు సృష్టించాడు. చెన్నైలోని SSN కాలేజ్ ఆఫ్ ఇంజినీరింగ్ నుంచి ఇన్ఫర్మేషన్ టెక్నాలజీలో BTech చేశాడు. కోచ్ సలహా మేరకు బ్యాటర్ నుంచి ఆఫ్ స్పిన్‌కు మారాడు. ఈ నిర్ణయం అశ్విన్ కెరీర్ తో పాటు భారత స్పిన్ చరిత్రను మార్చేసింది. భారత క్రికెట్‌పై చెరగని ముద్ర వేసేలా చేసింది. మాజీ స్పిన్నర్ సునీల్ సుబ్రమణ్యం మార్గదర్శకత్వంలో.. మాజీ క్రికెటర్ W V రామన్ శిక్షణలో అశ్విన్ తిరుగులేని బౌలర్ గా ఎదిగి.. అద్భుతాలు సృష్టించాడు.