రాధాగంజ్‌లోని అర్జున్ నగర్ నివాసి అయిన అంతర్జాతీయ జుజిట్సు క్రీడాకారిణి, మార్షల్ ఆర్ట్స్ కోచ్ రోహిణి కలాం (35) ఉరి వేసుకుని ఆత్మహత్యకు పాల్పడింది. నివేదికల ప్రకారం, రోహిణి అష్టాలోని ఒక ప్రైవేట్ పాఠశాలలో మార్షల్ ఆర్ట్స్ కోచ్‌గా పనిచేస్తుందని.. నిన్ననే దేవాస్‌కు తిరిగి వచ్చిందని వెల్లడించాయి. కుటుంబ సభ్యుల ప్రకారం, ఆదివారం ఉదయం రోహిణి బాగానే ఉన్నట్లు తెలిపారు. అల్పాహారం తర్వాత, ఆమెకు ఫోన్ కాల్ వచ్చిందని.. ఆ తర్వాత ఆమె గదిలోకి వెళ్లి లోపలి నుండి తలుపు లాక్ చేసుకున్నట్లు తెలిపారు. ఆమె చాలా సేపు బయటకు రాకపోయేసరికి, ఆమె చెల్లెలు ఒక ఇనుప రాడ్ (కడ్డీ)తో తలుపు పగలగొట్టి చూడగా, రోహిణి ఉరి వేసుకుని కనిపించిందని తెలిపారు.
దర్యాప్తు ఆరంభం
రోహిణి కలాం చెల్లెలు ఒక ఇనుప రాడ్‌తో తలుపును పగలగొట్టి గదిలోకి చూడగా, రోహిణి ఉరి వేసుకుని మృతదేహంగా కనిపించింది.గత సంవత్సరం, అబుదాబిలో జరిగిన అంతర్జాతీయ జుజిట్సు పోటీలో రోహిణి కలాం కాంస్య పతకాన్ని గెలుచుకున్నది. ఇటీవల ఆమె కడుపులో కణితికి శస్త్రచికిత్స జరిగినట్లు కుటుంబ సభ్యులు తెలిపారు. ప్రస్తుతానికి ఆత్మహత్యకు గల కారణం స్పష్టంగా తెలియలేదు, ఎటువంటి సూసైడ్ నోట్ కూడా లభించలేదు. సమాచారం అందుకున్న బిఎన్‌పి పోలీసులు ఘటనా స్థలానికి చేరి మృతదేహాన్ని జిల్లా ఆసుపత్రికి పోస్టుమార్టం కోసం పంపించారు. పోలీసులు కేసు నమోదు చేసి, దర్యాప్తు ప్రారంభించినట్లు తెలిపారు. మంచి భవిష్యత్తు ఉన్న రోహిణి కలాం ఆత్మహత్య చేసుకోవడం క్రీడా ప్రపంచాన్ని షాక్ కు గురి చేసింది. నెట్టింట క్రీడాకారులు సంతాపం తెలుపుతున్నారు.