బీజేపీ వ్యూహం ఫలించేనా.. ఎన్నికల బరిలోకి క్రికెటర్ ని..

వచ్చే లోక్‌సభ ఎన్నికల్లో పశ్చిమ బెంగాల్‌ నుంచి పోటీ చేయాలనే ప్రతిపాదనతో బీజేపీ నాయకత్వం షమీని సంప్రదించినట్లు సమాచారం. వచ్చే లోక్‌సభ ఎన్నికల్లో బెంగాల్‌ నుంచి స్టార్‌ క్రికెటర్‌ మహ్మద్‌ షమీని నామినేట్‌ చేసే అవకాశాలపై బీజేపీ ఆలోచిస్తోందని సంబంధిత వర్గాలు జాతీయ మీడియాకు తెలిపాయి.

షమీ రంజీ ట్రోఫీలో బెంగాల్‌కు ప్రాతినిథ్యం వహిస్తున్నాడు. ఈ ప్రతిపాదనతో బీజేపీ అధినాయకత్వం షమీకి చేరువైనట్లు సంబంధిత వర్గాలు తెలిపాయి. అయితే షమీ దీనిపై ఇంకా నిర్ణయం తీసుకోలేదు.

ప్రస్తుతం, షమీ ఇటీవల తగిలిన గాయం కారణంగా శస్త్రచికిత్స చేయించుకున్నాడు. దాని నుంచి కోలుకునేందుకు విరామం తీసుకుంటున్నాడు. పేసర్ శస్త్రచికిత్సను ధృవీకరించిన తర్వాత అతను త్వరగా కోలుకోవాలని ప్రధాని మోదీ ఆకాంక్షించారు. 

గాయం కారణంగా ODI ప్రపంచ కప్ లో షమీ ఆడలేకపోయాడు. అతను ఏడు మ్యాచ్‌లలో 10.70 సగటు మరియు 12.20 స్ట్రైక్ రేట్‌తో 24 వికెట్లు తీయడం ద్వారా జట్టును ఫైనల్‌కు చేరుకునేందుకు సహాయపడ్డాడు.

ఆస్ట్రేలియాతో జరిగిన ప్రపంచకప్ ఫైనల్స్‌లో ఓడిపోయిన తర్వాత, ప్రధాని టీమ్ ని వ్యక్తిగతంగా కలుసుకుని వారిని ఓదార్చారు. టోర్నీలో మహ్మద్ షమీ సంచలన ప్రదర్శన చేశాడని కొనియాడుతూ అతడిని ఆప్యాయంగా ఆలింగనం చేసుకున్నారు. కేంద్ర హోంమంత్రి అమిత్ షాతోనూ షమీ సమావేశమయ్యారు. ఇది కాకుండా, షమీ స్వగ్రామమైన అమ్రోహాలో క్రికెట్ స్టేడియం నిర్మిస్తామని ఉత్తరప్రదేశ్ ముఖ్యమంత్రి యోగి ఆదిత్యనాథ్ ప్రకటించారు.

పశ్చిమ బెంగాల్‌లో జరగనున్న లోక్‌సభ ఎన్నికలకు షమీని అభ్యర్థిగా ప్రతిపాదించారని, చర్చలు సానుకూలంగా ఉన్నాయని బీజేపీ వర్గాలు తెలిపాయి. షమీని రంగంలోకి దింపడం బెంగాల్‌లోని మైనారిటీల ప్రాబల్యం ఉన్న నియోజకవర్గాల్లో పార్టీ విజయాన్ని సాధించడంలో సహాయపడుతుందని బిజెపిలో అంతర్గత చర్చలు సూచిస్తున్నాయి.

షమీని బసిర్‌హత్ లోక్‌సభ నియోజకవర్గం నుండి పోటీకి దింపడంపై బీజేపీ దృష్టి సారిస్తోంది. బసిర్‌హత్ సరిహద్దుల్లోని సందేశ్‌ఖాలీ గ్రామంలో ఇటీవల హింసాకాండ చోటు చేసుకోవడంతో వార్తల్లో నిలిచింది.