ISRAEL: ఇలా హతమార్చడం... ఇజ్రాయెల్‌కు మాత్రమే సాధ్యం
కేవలం 12 గంటల వ్యవధిలోనే ఇద్దరు శత్రువులను హతమార్చిన ఇజ్రాయెల్‌;
ఇరాన్ కొత్త అధ్యక్షుడు మసౌద్ పెజెష్కియాన్ ప్రమాణస్వీకారానికి వెళ్లిన సమయంలో రాజధాని టెహ్రాన్‌లో హనియే హత్యకు గురయ్యాడు. లెబనాన్ రాజధాని బీరూట్‌లో హిజ్బుల్లా కమాండర్ ఫువాద్ షుక్ర్ ని ఇజ్రాయిల్ హతమార్చింది. ఫువాద్‌ని హతమార్చింది తామే అని ఇజ్రాయిల్ వైమానిక దళం బాధ్యత వహిస్తున్నప్పటికీ, హనియే మరణంపై మాత్రం ఇజ్రాయిల్ తమ ప్రమేయం లేదని చెబుతోంది.
అక్టోబర్ 7న హమాస్ ఇజ్రాయిల్‌పై దాడి చేసి 1200 మందిని హతమార్చడమే కాకుండా 200కి పైగా ఇజ్రాయిల్ పౌరుల్ని బందీలుగా పట్టుకుంది. అప్పటి నుంచి ఇజ్రాయిల్-హమాస్ మధ్య గాజా యుద్ధం ప్రారంభమైంది. ఇజ్రాయిల్ ప్రధాని బెంజమిన్ నెతన్యాహూ పలు సందర్భాల్లో హమాస్ నాయకులు ఎక్కడ ఉన్నా నిర్మూలిస్తామని చెప్పింది. ఇందుకు గూఢచార సంస్థ మొస్సాద్‌కి కూడా నెతన్యాహూ నుంచి ఆర్డర్స్ వెళ్లాయి. ఈ నేపథ్యంలోనే హనియే హత్య జరిగినట్లు తెలుస్తోంది. ఈ దాడి వెనక ఇజ్రాయిల్ ఉందని ఇరాన్ ఆరోపిస్తూ, దానికి ప్రతీకారం ఉంటుందని హెచ్చరించింది.
హమాస్ నేత హనియే హత్యలో అమెరికా ప్రమేయం లేదని ఆ దేశ విదేశాంగ మంత్రి ఆంటోని బ్లింకెన్ బుధవారం తెలిపారు. సింగపూర్ పర్యటన సందర్భంగా ఛానల్ న్యూస్ ఏషియాకు ఇచ్చిన ఇంటర్వ్యూలో బ్లింకెన్ మాట్లాడుతూ.. దీని గురించి మాకు తెలియదని, దీంట్లో మా ప్రమేయం లేదని చెప్పారు. ఇరాన్ కొత్త దేశాధ్యక్షుడి ప్రమాణ స్వీకారానికి హాజరైన కొన్ని గంటల తర్వాత హనియే మరణాన్ని ఇరాన్‌లోని రివల్యూషనరీ గార్డ్స్ ధృవీకరించారు. ఖతార్‌లో ఆశ్రయం పొందుతున్న హనియే, ఈ ప్రమాణస్వీకారం కోసమే టెహ్రాన్ వచ్చి, హత్యకు గురయ్యాడు. హమాస్-ఇజ్రాయిల్ పోరులో దౌత్యానికి అంతర్జాతీయంగా ఇతనే ప్రాతినిధ్యం వహిస్తున్నాడు. ఇజ్రాయిల్ ఆక్రమిత గోలన్ హైట్స్‌లో రాకెట్ దాడి చేసి, 12 మంది మరణానికి కారణమైన హిజ్బుల్లా కమాండర్‌ని ఇజ్రాయిల్ హతమార్చిన 24 గంటల్లోనే హనియే హత్య జరిగింది.