Donald Trump | : పుతిన్ నివాసం లక్ష్యంగా ఉక్రెయిన్ దాడిపై ట్రంప్ ఆగ్రహం

ప్రపంచ వ్యాప్తంగా శాంతి చర్చల ఊహాగానాలు వినిపిస్తున్న తరుణంలో.. రష్యా-ఉక్రెయిన్ యుద్ధం అనూహ్య మలుపు తిరిగింది. రష్యా అధ్యక్షుడు వ్లాదిమిర్ పుతిన్ అధికారిక నివాసాన్ని లక్ష్యంగా చేసుకుని ఉక్రెయిన్ భారీ డ్రోన్ దాడికి ప్రయత్నించిందన్న వార్తలు అంతర్జాతీయ రాజకీయాల్లో ప్రకంపనలు సృష్టిస్తున్నాయి. ఈ ఘటనపై అమెరికా అధ్యక్షుడు డొనాల్డ్ ట్రంప్ తీవ్రంగా స్పందించారు. శాంతి స్థాపన కోసం తాను ప్రయత్నిస్తున్న ఇలాంటి సున్నితమైన సమయంలో' ఇలాంటి దాడులు ఏమాత్రం ఆమోదయోగ్యం కాదని ఆయన హెచ్చరించారు.

పుతినే స్వయంగా ఫోన్ చేశారు..!

ఫ్లోరిడాలోని తన మార్-ఏ-లాగో రిసార్ట్‌లో ఇజ్రాయెల్ ప్రధాని బెంజమిన్ నెతన్యాహుతో భేటీ కావడానికి ముందు ట్రంప్ మీడియాతో మాట్లాడారు. సోమవారం ఉదయాన్నే అధ్యక్షుడు పుతిన్ తనకు స్వయంగా ఫోన్ చేసి.. తన నివాసంపై దాడి జరిగిందని వెల్లడించారని ట్రంప్ తెలిపారు. "యుద్ధంలో దాడులు సహజమే కానీ ఏకంగా అధ్యక్షుడి నివాసాన్ని లక్ష్యంగా చేసుకోవడం సరికాదు. పుతిన్ తన నివాసంపై దాడి జరిగిందని చెప్పారు. ఇది చాలా చెడ్డ విషయం. దీనిపై నాకు చాలా కోపంగా ఉంది" అని ట్రంప్ వ్యాఖ్యానించారు. అయితే అదే సమయంలో ఆయన ఒక ఆసక్తికర వ్యాఖ్య చేశారు. అసలు అటువంటి దాడి జరగకపోవడానికి కూడా అవకాశం ఉందని, ఈ వార్తలపై తనకు ఇంకా పూర్తి స్పష్టత లేదని, ఇంటెలిజెన్స్ నివేదికల కోసం ఎదురుచూస్తున్నానని చెప్పారు.

ఏకంగా 91 డ్రోన్లతో దాడి..

రష్యా విదేశాంగ మంత్రి సెర్గీ లావ్రోవ్ ఈ ఘటనపై మరిన్ని వివరాలు వెల్లడించారు. మాస్కో సమీపంలోని నోవ్‌గోరోడ్ ప్రాంతంలో ఉన్న పుతిన్ నివాసాన్ని లక్ష్యంగా చేసుకుని డిసెంబర్ 28, 29 తేదీల్లో ఉక్రెయిన్ ఏకంగా 91 దీర్ఘశ్రేణి డ్రోన్లను ప్రయోగించిందని ఆయన ఆరోపించారు. రష్యా వైమానిక రక్షణ వ్యవస్థలు వాటన్నింటినీ కూల్చి వేశాయని.. అదృష్టవశాత్తు ఎలాంటి ప్రాణనష్టం జరగలేదని తెలిపారు. ఈ చర్యను 'స్టేట్ టెర్రరిజం' (ప్రభుత్వ ఉగ్రవాదం) గా అభివర్ణించిన లావ్రోవ్.. రష్యా దీనికి గట్టిగా ప్రతీకారం తీర్చుకుంటుందని, ఇప్పటికే లక్ష్యాలను సిద్ధం చేసుకున్నామని హెచ్చరించారు.

అదంతా అబద్ధం: ఉక్రెయిన్

మరోవైపు రష్యా ఆరోపణలను ఉక్రెయిన్ అధ్యక్షుడు వ్లాదిమిర్ జెలెన్‌స్కీ తీవ్రంగా తోసిపుచ్చారు. పుతిన్ నివాసంపై తాము ఎలాంటి దాడి చేయలేదని, రష్యా కావాలనే 'కట్టుకథలు' చెబుతోందని మండిపడ్డారు. అమెరికా అధ్యక్షుడి బృందంతో తాము సాగిస్తున్న శాంతి చర్చలను చెడగొట్టడానికి, కీవ్‌లోని ఉక్రెయిన్ ప్రభుత్వ భవనాలపై భవిష్యత్తులో దాడులు చేయడానికి రష్యా ఈ తప్పుడు నెపాన్ని సృష్టిస్తోందని ఆయన ఆరోపించారు. రష్యా కేవలం ఒక సాకు కోసం వెతుకుతోందని.. తమది కేవలం ఆత్మరక్షణ పోరాటమే తప్ప ఉగ్రవాదం కాదని జెలెన్‌స్కీ స్పష్టం చేశారు.