AP: ఆంధ్రప్రదేశ్కు మైక్రోసాఫ్ట్ వ్యవస్థాపకుడు బిల్ గేట్స్
ఇటీవల ఆంధ్రప్రదేశ్ ప్రభుత్వం చేపడుతున్న సాంకేతిక ఆధారిత అభివృద్ధి కార్యక్రమాలకు అంతర్జాతీయ స్థాయిలో ప్రాధాన్యం పెరుగుతోంది. ఈ నేపథ్యంలో మైక్రోసాఫ్ట్ వ్యవస్థాపకుడు బిల్ గేట్స్ ఈ నెల 18న అమరావతికి రానున్నట్టు అధికార వర్గాలు వెల్లడించాయి. రాష్ట్ర ముఖ్యమంత్రి చంద్రబాబుతో ఆయన ప్రత్యేకంగా భేటీ కానున్నారు. ఈ సమావేశంలో రాష్ట్ర భవిష్యత్ అభివృద్ధికి సంబంధించిన కీలక అంశాలపై విస్తృత చర్చ జరిగే అవకాశం ఉందని సమాచారం. ప్రధానంగా ఆరోగ్య సంరక్షణ, వ్యవసాయం, విద్య వంటి కీలక రంగాల్లో ఆధునిక సాంకేతికత, ముఖ్యంగా కృత్రిమ మేధ (ఏఐ) వినియోగాన్ని ఎలా మరింత ప్రభావవంతంగా అమలు చేయాలన్నదానిపై ఇరువురి మధ్య చర్చ కేంద్రీకృతమయ్యే అవకాశముంది. ఇప్పటికే గత ఏడాది మార్చిలో ఆంధ్రప్రదేశ్ ప్రభుత్వం, బిల్ అండ్ మిలిందా గేట్స్ ఫౌండేషన్ మధ్య అవగాహన ఒప్పందం కుదిరింది. ఈ ఒప్పందం ద్వారా రాష్ట్రంలోని ప్రజలకు నాణ్యమైన సేవలు వేగంగా అందించడమే లక్ష్యంగా పెట్టుకున్నారు.
ఆరోగ్య సేవల్లోనూ....
ఆరోగ్య సేవల్లో డేటా ఆధారిత విశ్లేషణ, డిజిటల్ వ్యవసాయ విధానాలు, పాలనలో టెక్నాలజీ వినియోగం వంటి అంశాలను సమగ్రంగా అమలు చేయాలన్నది ఈ భాగస్వామ్య ప్రధాన ఉద్దేశ్యం. గ్రామీణ స్థాయి నుంచి పట్టణ స్థాయి వరకు ప్రజలకు అందే సేవల్లో పారదర్శకత, వేగం పెరగాలన్న దృష్టితో ప్రభుత్వం ముందడుగు వేస్తోంది. ఈ ప్రాజెక్టుల ప్రస్తుత అమలు స్థితి, భవిష్యత్ కార్యాచరణపై ముఖ్యమంత్రి – బిల్ గేట్స్ భేటీలో స్పష్టత రావచ్చని అధికార వర్గాలు భావిస్తున్నాయి. ఇదిలా ఉండగా, అమరావతిని అంతర్జాతీయ స్థాయి టెక్నాలజీ హబ్గా అభివృద్ధి చేయాలన్న లక్ష్యంతో ప్రభుత్వం చేపడుతున్న “క్వాంటమ్ వ్యాలీ” ప్రాజెక్టుపై కూడా చర్చ జరిగే అవకాశం ఉందని సమాచారం. ఈ క్వాంటమ్ వ్యాలీలో మైక్రోసాఫ్ట్ పెట్టుబడులు పెట్టే ప్రతిపాదన ఉందన్న ప్రచారం కొంతకాలంగా వినిపిస్తోంది. బిల్ గేట్స్ పర్యటన సందర్భంగా ఈ అంశంపై అధికారిక స్పష్టత వచ్చే అవకాశముందని రాజకీయ, పారిశ్రామిక వర్గాల్లో ఆసక్తి నెలకొంది. మరోవైపు, రాష్ట్రాన్ని “ఆరోగ్యాంధ్రప్రదేశ్”గా తీర్చిదిద్దాలన్న లక్ష్యంతో కూటమి ప్రభుత్వం వేగంగా అడుగులు వేస్తోంది. ఈ దిశగా అత్యంత ప్రతిష్ఠాత్మకంగా రూపొందించిన “సంజీవని” ప్రాజెక్టును త్వరలోనే రాష్ట్రవ్యాప్తంగా అమలు చేయనున్నారు. ఈ ప్రాజెక్టు ద్వారా ప్రజల ఆరోగ్యాన్ని ముందస్తుగా పర్యవేక్షించడం, వ్యాధులను తొలిదశలోనే గుర్తించడం ప్రధాన లక్ష్యంగా పెట్టుకున్నారు.
సంజీవని ప్రాజెక్టు...
సంజీవని ప్రాజెక్టు కింద రాష్ట్రవ్యాప్తంగా సుమారు 72 లక్షల మందికి వివిధ రకాల వైద్య పరీక్షలు నిర్వహించి, వారి ఆరోగ్యానికి సంబంధించిన సమగ్ర హెల్త్ ప్రొఫైల్స్ రూపొందించనున్నట్టు ముఖ్యమంత్రి ఇటీవల వెల్లడించారు. ఈ ప్రాజెక్టులో బిల్ అండ్ మిలిందా గేట్స్ ఫౌండేషన్కీ లక భాగస్వామిగా వ్యవహరిస్తోంది. అత్యాధునిక సాంకేతికతను వినియోగించి ప్రజల ఆరోగ్య సమాచారాన్ని సురక్షితంగా, సమర్థంగా నిర్వహించడమే ఈ కార్యక్రమం ప్రత్యేకతగా పేర్కొన్నారు. ప్రభుత్వం, గేట్స్ ఫౌండేషన్, అలాగే టాటా కన్సల్టెన్సీ సహకారంతో డిజినెర్వ్ సెంటర్ ద్వారా ప్రతి పౌరుడికి డిజిటల్ హెల్త్ రికార్డు రూపొందిస్తున్నట్టు సీఎం వివరించారు. ఈ డిజిటల్ రికార్డులు భవిష్యత్లో వైద్య సేవలు పొందేటప్పుడు కీలకంగా ఉపయోగపడతాయని తెలిపారు. వ్యక్తుల ఆరోగ్య పరిస్థితిని ఎప్పటికప్పుడు గమనించి, సూచనలు ఇవ్వడానికి ఈ వ్యవస్థ ఉపయోగపడనుందని ప్రభుత్వం భావిస్తోంది.
పైలెట్ ప్రాజెక్టు కుప్పంలో....
సంజీవని ప్రాజెక్టును తొలి దశలో కుప్పంలో పైలట్ ప్రాజెక్టుగా ప్రారంభించి, విజయవంతంగా అమలు చేసిన తర్వాత చిత్తూరు జిల్లాకు విస్తరించారు. ప్రస్తుతం లభిస్తున్న ఫలితాలను బట్టి ఈ ఏడాదిలోనే రాష్ట్రవ్యాప్తంగా విస్తరించేలా కార్యాచరణ రూపొందిస్తున్నామని ముఖ్యమంత్రి వెల్లడించారు. వైద్య పరీక్షల అనంతరం ప్రతి వ్యక్తికి ఆరోగ్య స్కోరింగ్ ఇవ్వడం ద్వారా, వారు తమ ఆరోగ్య స్థితిని సులభంగా అర్థం చేసుకునే విధంగా చర్యలు తీసుకుంటున్నట్టు తెలిపారు. ఈ ప్రాజెక్టు కింద మొత్తం 42 రకాల వైద్య పరీక్షలు నిర్వహించేందుకు ఇప్పటికే ఆదేశాలు జారీ చేసినట్టు ప్రభుత్వం స్పష్టం చేసింది. రక్తపరీక్షలు, జీవనశైలి సంబంధిత పరీక్షలు, దీర్ఘకాలిక వ్యాధుల గుర్తింపు వంటి అంశాలు ఇందులో భాగంగా ఉంటాయని అధికారులు చెబుతున్నారు. దీని ద్వారా ప్రభుత్వ ఆసుపత్రులపై భారం తగ్గడంతో పాటు, ప్రజలకు ముందస్తు ఆరోగ్య భద్రత కల్పించాలన్నది ప్రభుత్వ ఉద్దేశం. మొత్తంగా చూస్తే, బిల్ గేట్స్ అమరావతి పర్యటన రాష్ట్ర అభివృద్ధికి కీలక మలుపుగా మారే అవకాశముందని రాజకీయ విశ్లేషకులు భావిస్తున్నారు. ఈ అనంతరం వెలువడే నిర్ణయాలు ఆంధ్రప్రదేశ్ భవిష్యత్ అభివృద్ధి దిశను మలుపు తిప్పుతాయన్న అంచనాలు పెరుగుతున్నాయి.