CBN: తెలుగు వైభవం చాటేలా అమరావతి అభివృద్ధి
ఆంధ్రప్రదేశ్ రాజధాని అమరావతి అభివృద్ధిని వేగవంతం చేయాలని రాష్ట్ర ప్రభుత్వం మరింత దృష్టి సారిస్తోంది. రాజధాని నిర్మాణం కేవలం పరిపాలనా కేంద్రంగా మాత్రమే కాకుండా తెలుగు సంస్కృతి, సంప్రదాయాల వైభవాన్ని ప్రతిబింబించేలా ఉండాలని రాష్ట్ర ముఖ్యమంత్రి చంద్రబాబు పేర్కొన్నారు. అమరావతి అభివృద్ధి పనుల్లో స్వయం సమృద్ధి సాధించే విధంగా సెల్ఫ్ ఫైనాన్స్ ప్రాజెక్టులకు ప్రాధాన్యం ఇవ్వాలని ఆయన అధికారులకు సూచించారు. పెట్టుబడులను ఆకర్షించేలా మౌలిక వసతులు ఏర్పాటు చేయడం, క్రీడలు మరియు పర్యాటక రంగాలను అభివృద్ధి చేసే విధంగా ప్రత్యేక ప్రణాళికలు సిద్ధం చేయాలని కూడా ఆయన ఆదేశించారు. మంగళవారం సచివాలయంలో ముఖ్యమంత్రి చంద్రబాబు అధ్యక్షతన జరిగిన సీఆర్డీఏ అథారిటీ 59వ సమావేశంలో రాజధాని అభివృద్ధికి సంబంధించిన పలు కీలక అంశాలపై విస్తృతంగా చర్చించారు. భూ కేటాయింపులు, మౌలిక సదుపాయాల అభివృద్ధి, విద్యా మరియు సాంస్కృతిక ప్రాజెక్టుల అమలు వంటి పలు ప్రతిపాదనలకు ఈ సమావేశంలో సీఆర్డీఏ ఆమోదం తెలిపింది. అమరావతిని అంతర్జాతీయ స్థాయిలో అభివృద్ధి చేయాలనే లక్ష్యంతో పెట్టుబడులను ఆకర్షించేందుకు ప్రభుత్వ శాఖలు సమన్వయంతో పనిచేయాలని ముఖ్యమంత్రి సూచించారు.
రాజధాని ప్రాంతంలో...
సమావేశంలో ముఖ్యంగా రాజధాని ప్రాంతంలో విద్యా, సాంస్కృతిక మరియు పరిపాలనా నిర్మాణాలకు భూముల కేటాయింపుపై కీలక నిర్ణయాలు తీసుకున్నారు. కేంద్ర విద్యా బోర్డు అయిన సీబీఎస్ఈ కార్యాలయం నిర్మాణం కోసం అమరావతిలో 80 సెంట్ల భూమి కేటాయించేందుకు సీఆర్డీఏ అంగీకారం తెలిపింది. ఈ నిర్ణయం ద్వారా అమరావతిని విద్యా కేంద్రంగా కూడా అభివృద్ధి చేయాలనే ప్రభుత్వ లక్ష్యం ప్రతిబింబిస్తుందని అధికారులు తెలిపారు. అదేవిధంగా తుళ్లూరు ఎడ్యుకేషనల్ సొసైటీకి మూడు ఎకరాల భూమి కేటాయించేందుకు కూడా అథారిటీ ఆమోదం తెలిపింది. గ్రామీణాభివృద్ధి మరియు స్థానిక పరిపాలనకు సంబంధించిన శిక్షణా కార్యక్రమాలు నిర్వహించే సంస్థ అయినఏపీఎస్ఐఆర్డీకి ఐదు ఎకరాల భూమిని కేటాయించేందుకు కూడా అనుమతి ఇచ్చారు. ఈ సంస్థ ద్వారా గ్రామీణ పాలనలో పనిచేసే అధికారులు, సిబ్బందికి శిక్షణ కార్యక్రమాలు నిర్వహించేందుకు అవసరమైన సదుపాయాలు ఏర్పాటు చేయాలని ప్రభుత్వం భావిస్తోంది. రాజధాని ప్రాంతంలో ప్రభుత్వ కార్యాలయాల నిర్మాణానికి కూడా ఈ సమావేశంలో కీలక నిర్ణయాలు తీసుకున్నారు. అమరావతిలో నిర్మాణంలో ఉన్న సచివాలయం మరియు హెచ్వోడీ టవర్ల పనులకు మొత్తం రూ.2,316 కోట్లకు పరిపాలనా అనుమతులు ఇవ్వాలని సీఆర్డీఏ నిర్ణయించింది. ఈ నిర్మాణాల ద్వారా ప్రభుత్వ శాఖలన్నీ ఒకేచోట పనిచేసే విధంగా ఆధునిక కార్యాలయ సముదాయాలను ఏర్పాటు చేయాలని ప్రభుత్వం భావిస్తోంది. ఇదే సమయంలో తెలుగు సంస్కృతి, కళల ప్రోత్సాహానికి ప్రత్యేకంగా ఒక సాంస్కృతిక కేంద్రాన్ని నిర్మించేందుకు కూడా ప్రభుత్వం నిర్ణయించింది. సుమారు రూ.119 కోట్ల వ్యయంతో అమరావతిలో తెలుగు కల్చరల్ సెంటర్ నిర్మాణానికి సీఆర్డీఏ అంగీకారం తెలిపింది. ఈ కేంద్రం ద్వారా తెలుగు భాష, సంస్కృతి, సాహిత్యం, కళలను ప్రపంచానికి పరిచయం చేసే కార్యక్రమాలు నిర్వహించేందుకు అవకాశం ఉంటుందని అధికారులు తెలిపారు. ఈ ప్రాజెక్టును ఈపీసీ విధానంలో అమలు చేసే అంశంపై సమావేశంలో సమీక్షించారు.
సచివాలయంలో జరిగిన ఈ సమావేశానికి రాష్ట్ర పురపాలక శాఖ మంత్రి పి నారాయణ, ఆర్థిక మంత్రి పయ్యావుల కేశవ్ , రాష్ట్ర ప్రధాన కార్యదర్శి సాయిప్రసాద్ సహా పట్టణాభివృద్ధి శాఖ, సీఆర్డీఏ, ఏడీసీఎల్కు చెందిన ఉన్నతాధికారులు హాజరయ్యారు. అమరావతి అభివృద్ధికి సంబంధించిన పలు ప్రాజెక్టుల అమలు స్థితిపై అధికారులు వివరాలు అందించారు. భూ కేటాయింపులకు సంబంధించిన జీఓలు జారీ చేసే అంశం, ప్రభుత్వ సంస్థలకు అవసరమైన మౌలిక సదుపాయాల ఏర్పాటు వంటి విషయాలపై కూడా చర్చించారు. అమరావతిని అంతర్జాతీయ ప్రమాణాలతో అభివృద్ధి చేయాలంటే పెట్టుబడులను ఆకర్షించడం అత్యంత కీలకమని ముఖ్యమంత్రి చంద్రబాబు అన్నారు. రాష్ట్రానికి రావాలనుకునే సంస్థలతో అధికారులు నిరంతరం సంప్రదింపులు కొనసాగించాలని ఆయన సూచించారు. పెట్టుబడిదారులకు అనుకూల వాతావరణం కల్పించేందుకు ప్రభుత్వ యంత్రాంగం చురుకుగా పనిచేయాలని తెలిపారు. ప్రత్యేకంగా క్రీడా మౌలిక వసతులు, పర్యాటక ఆకర్షణలు ఏర్పాటు చేస్తే అమరావతికి అంతర్జాతీయ గుర్తింపు వచ్చే అవకాశం ఉందని ఆయన అభిప్రాయపడ్డారు. రాజధాని పరిధిలో పెద్ద స్థాయి సమావేశాలు, అంతర్జాతీయ సదస్సులు నిర్వహించుకునేలా కన్వెన్షన్ సెంటర్ నిర్మాణం ప్రతిపాదనపై కూడా ఈ సమావేశంలో చర్చించారు. ఇప్పటికే ప్రభుత్వం ఈ ప్రాజెక్టును ప్రతిపాదించగా, దాని అమలు విధానంపై అధికారులతో ముఖ్యమంత్రి చంద్రబాబు నాయుడు సమీక్షించారు.