పోలీస్ ఇన్ఫార్మర్ నెపంతో గిరిజనుడి హతమార్చిన మావోలు

విశాఖ ఏజెన్సీలో మరోసారి అలజడి మొదలైంది. పోలీస్ ఇన్ఫార్మర్ అనే అనుమానంతో ఓ గిరిజనుడిని మావోయిస్టులు హత్యచేశారు. దీంతో ఏఒబిలో తీవ్ర ఉద్రిక్త పరిస్థితులు నెలకొన్నాయి. అయితే నిన్న పోలీసులు జరిపిన కాల్పుల్లో ముగ్గురు మావోయిస్టులు మృతిచెందారు. దీంతో రెచ్చిపోయిన మావోలు.. పోలీసు ఇన్ఫార్మర్ అనే నెపంతో ఆంధ్రా-ఒరిస్సా సరిహద్దుల్లో ఓ గిరిజనుడిని హతమార్చారు. జి మాడుగుల మండలం నుర్మతి పంచాయితీ, వాకపల్లి గ్రామానికి చెందిన గెమ్మెలి కృష్ణారావు అనే గిరిజనుడిని ఆదివారం రాత్రి చంపేశారు. ఘటనా స్థలంలో మావోయిస్టు పార్టీ పెదబయలు-కోరుకొండ ఏరియా కమిటీ పేరుతో లేఖను వదిలి వెళ్లారు. కృష్ణారావు పోలీసు ఇన్ఫార్మర్ గా వ్యవహరిస్తూ... ప్రజా వ్యతిరేక విధానాలకు పాల్పడుతుండటంతో హతమార్చినట్లు లేఖలో పేర్కొన్నారు. మృతుడు కృష్ణారావుకు భార్య, ముగ్గురు పిల్లలు ఉన్నారు.