MEDICINE: వైద్యుల ప్రిస్క్రిప్షన్ లేకుండా వాడితే ప్రమాదం

భారతదేశ ఆరోగ్య వ్యవస్థకు యాంటీబయాటిక్ రెసిస్టెన్స్ (AMR) రూపంలో పెను ముప్పు పొంచి ఉందని పరిశోధనలు హెచ్చరిస్తున్నాయి. ఇది కేవలం ఆందోళనకరమైన ప్రశ్న కాదు; సాధారణ ఇన్ఫెక్షన్లకు చికిత్స లేకుండా పోయే ప్రమాదం ఉంది. ఆసియన్ ఇన్‌స్టిట్యూట్ ఆఫ్ గ్యాస్ట్రోఎంటరాలజీ (AIG) హాస్పిటల్ ఇటీవల నిర్వహించిన అంతర్జాతీయ అధ్యయనం భారతదేశంలో AMR స్థాయి అంతర్జాతీయ దేశాలతో పోలిస్తే చాలా ఎక్కువని తేల్చింది. అమెరికా, ఇటలీ, నెదర్లాండ్స్‌తో పాటు భారత్‌లో జరిగిన ఈ పరిశోధన, ఎండోస్కోపీ చేయించుకున్న 83% మంది రోగుల్లో మల్టీ-డ్రగ్ రెసిస్టెంట్ (MDR) బ్యాక్టీరియా ఉన్నట్టు వెల్లడించింది. అంటే, ఈ బ్యాక్టీరియాపై సాధారణ యాంటీబయాటిక్స్ పనిచేయడం లేదు. చికిత్సకు మిగిలి ఉన్న చివరి రెండు రకాల మందులు కూడా ఎప్పుడైనా విఫలం కావచ్చని నిపుణులు హెచ్చరిస్తున్నారు.

ఈ సమస్యకు ప్రధాన కారణాలు వైద్యుల సలహా లేకుండా యాంటీబయాటిక్స్ తీసుకోవడం (సెల్ఫ్-మెడికేషన్), మరియు పూర్తి కోర్సు పూర్తి చేయకపోవడం. మెడికల్ స్టోర్‌లలో సులభంగా లభించడం వల్ల బ్యాక్టీరియాలో మ్యుటేషన్ జరిగి రెసిస్టెంట్ స్ట్రెయిన్స్‌గా మారుతున్నాయి. యూరినరీ ట్రాక్ట్ ఇన్ఫెక్షన్ (UTI)కు కారణమయ్యే ఈకొలీ బ్యాక్టీరియాలో 70% రకాలు MDRగా మారాయి. ప్రపంచ ఆరోగ్య సంస్థ (WHO) నివేదిక ప్రకారం, ప్రపంచవ్యాప్తంగా ప్రతి ఏటా 1.3 మిలియన్ల మరణాలకు AMR కారణమవుతుండగా, భారతదేశంలో మాత్రమే రోజుకు 58,000 మరణాలు జరుగుతున్నాయని అంచనా. వార్షికంగా 10 లక్షల మంది భారతీయులు AMR కారణంగా చనిపోతున్నారు. పర్యావరణ కాలుష్యం, ఆసుపత్రి వ్యవస్థల్లో హైజీన్ లోపాలు కూడా ఈ 'సైలెంట్ పాండమిక్'ను పెంచుతున్నాయి.

వైద్యుల సలహా లేకుండా యాంటీబయాటిక్స్ వాడకం పూర్తిగా మానేయాలి. దగ్గు, జలుబు వంటి వైరల్ ఇన్ఫెక్షన్లకు యాంటీబయాటిక్స్ వాడకూడదు. చేతులు తరచూ కడగాలి, పరిసరాలను పరిశుభ్రంగా ఉంచుకోవాలి. టెటనస్, ఫ్లూ వంటి వ్యాక్సిన్లను తప్పకుండా తీసుకోవాలి. యాంటీబయాటిక్స్ విక్రయానికి కఠిన చట్టాలు తీసుకురావాల్సిన అవసరం ఉందని నిపుణులు కోరుతున్నారు. ప్రజల్లో అవగాహన కల్పించడం తక్షణ కర్తవ్యం.