TTD: నిత్యాన్నదాన కేంద్రం ప్రారంభించిన టీటీడీ ఛైర్మన్
వైయస్ఆర్ కడప జిల్లాలోని ఒంటిమిట్ట శ్రీ కోదండ రామస్వామి ఆలయం వద్ద భక్తులకు ఉచితంగా భోజనం అందించే నిత్యాన్నదాన కేంద్రాన్ని తిరుమల తిరుపతి దేవస్థానం (తితిదే) ప్రారంభించింది. ఈ కార్యక్రమాన్ని తితిదే ఛైర్మన్ బీఆర్ నాయుడు అధికారికంగా ప్రారంభించారు. ఈ సందర్భంగా ఆలయ ఛైర్మన్, జిల్లా కలెక్టర్, ఎస్పీతో పాటు ఇతర అధికారులు కూడా పాల్గొన్నారు. కార్యక్రమం అనంతరం భక్తులకు అన్నప్రసాదాన్ని స్వయంగా వడ్డిస్తూ సేవలో పాల్గొన్నారు. గత సంవత్సరం శ్రీరాములవారి కల్యాణోత్సవానికి ముఖ్యమంత్రి నారా చంద్రబాబు నాయుడు హాజరైన సందర్భంగా, తిరుమలలో అమలు చేస్తున్న నిత్యాన్నదాన విధానం తరహాలో ఒంటిమిట్ట ఆలయంలో కూడా భక్తులకు నిరంతరం అన్నప్రసాదం అందించే కేంద్రాన్ని ఏర్పాటు చేయాలని అధికారులను ఆయన ఆదేశించారు. ఆ సూచనల మేరకు తితిదే ఈ అన్నదాన కేంద్రాన్ని ఏర్పాటు చేసి ప్రారంభించింది. ఆలయానికి వచ్చే భక్తులు ఇకపై ప్రతిరోజూ ఉచితంగా భోజనం పొందే అవకాశం కలగనుంది.
ఇదిలా ఉండగా, మరో వారం రోజుల్లో ఆలయంలో బ్రహ్మోత్సవాలు ప్రారంభం కానున్నాయి. ఈ నేపథ్యంలో భక్తులకు సౌకర్యాలు కల్పించేందుకు ఆలయ అధికారులు విస్తృత ఏర్పాట్లు చేపడుతున్నారు. ముఖ్యంగా ఏప్రిల్ 1న జరగబోయే ఒంటిమిట్ట శ్రీ సీతారామ కల్యాణ మహోత్సవాన్ని అత్యంత వైభవంగా నిర్వహించేందుకు చర్యలు తీసుకుంటున్నట్లు ఆలయ ఛైర్మన్ వెల్లడించారు. భక్తుల సంఖ్య అధికంగా ఉండే అవకాశం ఉన్నందున అన్నదాన కేంద్రం కూడా వారికి ఎంతో ఉపయోగపడుతుందని అధికారులు తెలిపారు.