AR Rahman : ఏఆర్ రెహమాన్ కోసం రెమ్యునరేషన్ వదులుకున్న శ్రీదేవి
తన చివరి సినిమా 'మామ్' కోసం దివంగత నటి శ్రీదేవి రెమ్యునరేషన్ వదులుకున్నారనే ఆసక్తికర విషయాన్ని ఆమె భర్త, నిర్మాత బోనీ కపూర్ వెల్లడించారు. ఈ సినిమాకు ఆస్కార్ అవార్డు గ్రహీత ఏఆర్ రెహమాన్ సంగీతం అందించాలని ఆమె ఎంతగా కోరుకున్నారో ఈ సంఘటన ద్వారా తెలుస్తుంది. 'మామ్' సినిమాకు ఏఆర్ రెహమాన్‌ను సంగీత దర్శకుడిగా తీసుకోవాలని బోనీ కపూర్ భావించారు. అయితే, రెహమాన్ రెమ్యునరేషన్ ఎక్కువ కావడంతో బడ్జెట్ సమస్య తలెత్తింది. ఈ విషయం తెలిసిన శ్రీదేవి, రెహమాన్‌ను సినిమాలోకి తీసుకోవడానికి తన రెమ్యునరేషన్ నుంచి సుమారు రూ. 50-70 లక్షలు వదులుకోవడానికి సిద్ధమయ్యారు. తన రెమ్యునరేషన్‌లో మిగిలిన బ్యాలెన్స్‌ను రెహమాన్‌కు ఇవ్వాలని బోనీ కపూర్‌కు సూచించారు. ఈ నిర్ణయం శ్రీదేవికి సినిమాపై, ముఖ్యంగా దాని నాణ్యతపై ఎంత అంకితభావం ఉందో తెలియజేస్తుంది. కేవలం నటిగా కాకుండా, సినిమా విజయం కోసం ఆర్థికంగా కూడా ఆమె భాగమయ్యారు. ఇదే సినిమా షూటింగ్‌లో శ్రీదేవి తన పాత్రలో పూర్తిగా లీనమైపోయారు. తన పాత్రకు ఎలాంటి ఆటంకం కలగకుండా ఉండాలని, షూటింగ్ సమయంలో బోనీ కపూర్‌తో ఒకే గదిలో ఉండటానికి కూడా ఆమె నిరాకరించారు. కాగా మామ్ సినిమాకు శ్రీదేవికి ఉత్తమ నటిగా జాతీయ పురస్కారం, అలాగే ఏఆర్ రెహమాన్‌కు ఉత్తమ నేపథ్య సంగీతానికి జాతీయ పురస్కారం లభించడం విశేషం.