Allu Arjun Arrest : అల్లు అర్జున్ అరెస్ట్ ను ఖండించిన బండి సంజయ్

ఈ నెల 4న సంధ్య థియేటర్ తొక్కిసలాటలో మృతి చెందిన రేవతి కేస్ లో తాజాగా పోలీస్ లు అల్లు అర్జున్ ను అరెస్ట్ చేశారు. ఈ విషయంపై అన్ని వర్గాల్లో భిన్నాభిప్రాయాలు వ్యక్తం అవుతున్నాయి. మెల్లగా ఈ అంశం రాజకీయ రంగు పులుముకుంటోంది. ఇప్పటికే బిఆర్ఎస్ ఎమ్మెల్యే కేటీఆర్ సోషల్ మీడియాలో అల్లు అర్జున్ కు సపోర్ట్ గా రేవంత్ రెడ్డికి వ్యతిరేకంగా ఓ పోస్ట్ పెట్టాడు. తాజాగా కేంద్ర మంత్రి బండి సంజయ్ సైతం ఇదే అంశంపై రియాక్ట్ అయ్యాడు. బండి సంజయ్ తనదైన శైలిలో రేవంత్ ను టార్గెట్ చేస్తూ ఘాటుగా స్పందించాడు. అతను విడుదల చేసిన లెటర్ చూస్తే..

‘‘జాతీయ అవార్డ్ విజేత అల్లు అర్జున్ అరెస్ట్ ను ఖండిస్తున్నాం. అసలు బెన్ఫిట్ షోలకు అనుమతి ఇచ్చింది ఎవరు..?. ముందస్తు జాగ్రత్తలు తీసుకోకుండా సినిమా ప్రదర్శించింది ఎవరు?. సినిమా కోసం వెళ్లి తొక్కిసలాట జరిగి రేవతి అనే మహిళ ప్రాణాలు కోల్పోవడం అత్యంత బాధాకరం. దీనికి అసలు కారకులు, రాష్ట్ర పాలకులే. చర్యలు తీసుకోవలసింది ముమ్మాటికీ కాంగ్రెస్ ప్రభుత్వం పైనే. రేవంత్ రెడ్డి బ్రదర్స్ వేధింపుల వల్లే చనిపోతున్నా అని సూసైడ్ లెటర్ రాసి సిఎం సొంత గ్రామం కొండారెడ్డిపల్లి మాజీ సర్పంచ్ సాయి రెడ్డి ఆత్మహత్య చేసుకుంటే రేవంత్ బ్రదర్స్ ని ఎందుకు అరెస్టులు చేయరు?

రేషన్ కార్డు నిబంధనల వల్లే, రుణమాఫీ కాక ఆత్మహత్య చేసుకుంటున్నా అని సూసైడ్ లెటర్ రాసి మేడ్చల్ వ్యవసాయ కార్యాలయం వద్ద సురేందర్ రెడ్డి అనే రైతు ఆత్మహత్య చేసుకుంటే కారకుడైన రేవంత్ రెడ్డిని ఎందుకు అరెస్టు చేయరు?. అరెస్టు చేయాల్సి వస్తే ముందు రేవంత్ రెడ్డి సోదరులను అరెస్టు చేయాలి.

ఏడాది పాలనలో రైతులను బలిగొన్నందుకు ఎవరిని అరెస్టు చేయాలి?. ఫుడ్ పాయిజన్లతో 49 మంది విద్యార్థులు చనిపోయారు. దీనికి ఎవరిని అరెస్టు చేయాలి?. ఫార్మా సిటీ పేరుతో లగచర్ల గిరిజన బతుకులను ఛిద్రం చేశారు. దీనికి ఎవరిని అరెస్టు చేయాలి? చట్టం అల్లు అర్జున్ విషయంలోనే కాదు ఎనుముల రేవంత్ రెడ్డి అండ్ బ్రదర్స్ విషయంలోనూ స్పందించాలి. చట్టం ఎవ్వరికీ చుట్టం కాకూడదు’’..

ఇదీ బండి సంజయ్ స్పందన. మరోవైపు చట్టం తన పని తను చేసుకుపోతుంది అంటూ రేవంత్ వ్యాఖ్యానించడం చూస్తే ఇప్పుడు ప్రభుత్వం ఈ విషయంలో తగ్గేదే లే అన్నట్టుగా ఉందనుకోవచ్చు.