RRR: నాటు నాటుకు ఆస్కార్.. అతడే నిజమైన విజేత
RRR: ఆర్ఆర్ఆర్ చిత్రంలోని నాటు నాటు ఆస్కార్‌ను గెలుచుకోవడం ప్రపంచవ్యాప్తంగా ఉన్న తెలుగువారందరికీ గర్వకారణం. అసలైన గాయకులు ప్రశంసలు అందుకోవడం నిజంగా హర్షణీయం. సంగీత స్వరకర్త కీరవాణి, గీత రచయిత చంద్రబోస్‌లకు ఈ అవార్డు దక్కడం వారి అదృష్టం. కానీ, ముఖ్యంగా నాటు నాటు పాట కోసం, మరొక వ్యక్తి ఈ అవార్డుకు అర్హుడు. ఆ క్రెడిట్ అతడికి తప్పక రావాలి. అతనే డ్యాన్స్ కొరియోగ్రాఫర్ ప్రేమ్ రక్షిత్. కీరవాణి అద్భుతమైన ట్యూన్‌ను కంపోజ్ చేసాడు, దానికి చంద్రబోస్ సరైన పదాలను సమకూర్చాడు. కానీ దానికి తగిన స్టెప్పులు లేకపోతే ఆ పాట ఇంతగా జనాన్ని ప్రభావితం చేసేది కాదు. నాటు నాటు పాట గురించి ఈ రోజు ఇంత మంది మాట్లాడుకుంటున్నారంటే ఆ పాటకు వేసిన డ్యాన్స్ ప్రధాన కారణంగా చెప్పుకోవాలి. అందుకే నాటు పాట ప్రపంచ ప్రేక్షకులను ఉర్రూతలూగించింది. బీట్ మరియు లిరిక్స్ కంటే ప్రేమ్ రక్షిత్ కంపోజ్ చేసిన పాటలో షఫుల్ స్టెప్స్ ప్రజలను మంత్రముగ్దులను చేశాయనడంలో అతిశయోక్తి లేదు. ఈ విషయాన్ని తప్పక అందరూ అంగీకరించాల్సిందే. రామ్ చరణ్, ఎన్టీఆర్ డ్యాన్స్ మూవ్‌మెంట్‌లను పర్ఫెక్ట్ సింక్‌లో వచ్చేలా ప్రయత్నించి సక్సెస్ అయ్యారు.
కానీ ఆస్కార్ అకాడమీ అవార్డ్స్ సంగీత స్వరకర్త, గీత రచయితకు ఉత్తమ ఒరిజినల్ సాంగ్ అవార్డును అందజేసింది. ఆస్కార్‌లకు నామినేట్ అయ్యే ఒరిజినల్ పాటలు సాధారణంగా రిహన్న, టేలర్ స్విఫ్ట్ లేదా లేడీ గాగా వంటి ప్రపంచ ప్రఖ్యాత పాప్ సింగర్‌ల నుండి ఉంటాయి. సంగీతం మరియు సాహిత్యంపై ప్రధానంగా దృష్టి కేంద్రీకరిస్తారు. అయితే నాటు నాటు సాధారణ పాటలకు మినహాయింపు. ఆస్కార్ వారి నిబంధనల ప్రకారం కేవలం కీరవాణి, చంద్రబోస్‌లకు ప్రతిష్టాత్మకమైన అవార్డును అందించి ఉండవచ్చు. కానీ రాజమౌళి యొక్క విజువలైజేషన్‌తో పాటు చరణ్, ఎన్టీఆర్ డ్యాన్స్ కూడా ఆస్కార్‌ను అందుకోవడానికి సహాయపడిందనడంలో ఎటువంటి సందేహం లేదు. అందుకే నాటు నాటుకు కొరియోగ్రఫీ చేసిన ప్రేమ్ రక్షిత్ కూడా ఆస్కార్ విజేత. వేదిక మీద లేకపోవచ్చుకానీ అతడి కష్టం కచ్చితంగా గుర్తుండిపోతుంది. మరిన్ని మంచి చిత్రాల్లో అవకాశాలు అందిపుచ్చుకుంటాడు.
