Ram Charan Birthday Special : హ్యాపీ బర్త్ డే గ్లోబల్ స్టార్ రామ్ చరణ్

రామ్ చరణ్.. చిరుతలా దూసుకొచ్చి మెగాఅభిమానులకు నాయక్ లా మారిన మగధీరుడు. డైనమిక్ డాన్స్ లతో, స్టన్నింగ్ స్టంట్స్ తో సాలిడ్ హిట్స్ కొడుతున్న మెగాపవర్ స్టార్. మెగాస్టార్ చిరంజీవి వారసుడిగా ఎంట్రీ ఇచ్చి షార్ట్ టైంలోనే టాప్ హీరో అయిపోయాడు. ఇక.. 'ట్రిపుల్ ఆర్'తో గ్లోబల్ స్టార్ గా మారిన మెగాపవర్ స్టార్ రామ్ చరణ్ బర్త్ డే సందర్భంగా అతని కెరీర్ గురించిన విశేషాలను ఓ సారి చూద్దాం.

చిరంజీవి వారసుడుగా సులువుగా టాలీవుడ్ లోకి ఎంట్రీ ఇచ్చాడు రామ్ చరణ్ అనుకున్నారు చాలామంది. నిజమే.. అతని ఎంట్రీ సులువుగానే ఉండొచ్చు. కానీ అంతకు మించిన బరువు కూడా ఉంది. ఆ బరువును తొలి సినిమాకే మాగ్జిమం దింపేసుకున్నాడు చరణ్. ఫస్ట్ మూవీకి బెస్ట్ అనిపించుకోకున్నా మెగాస్టార్ వారసుడుగా నిలబడతాడు అనిపించుకున్నాడు. అప్పటి నుంచి అంచెలంచెలుగా ఎదుగుతూ మంచి కథలు పడ్డప్పుడల్లా బాక్సాఫీస్ ను షేక్ చేస్తూ టాలీవుడ్ రంగస్థలంపై మెగా జెండా పాతేశాడు.

మెగాస్టార్ గా తెలుగు సినిమా పరిశ్రమలో తిరుగులేని స్థానం సంపాదించుకున్నాడు చిరంజీవి. సౌత్ ఇండియన్ సినిమాలో రజినీకాంత్ తర్వాత ఆ రేంజ్ ఉన్న ఛరిష్మా ఉన్న స్టార్. ముఖ్యంగా తెలుగులో అన్నయ్యలా ఎందరికో ఆదర్శం ఆయన. మరోవైపు పవన్ కళ్యాణ్ మెగా రేంజ్ ను మరో లెవల్ కు తీసుకువెళ్లి ఉన్నాడు. మరి అలాంటి స్టార్ తనయుడు వెండితెర ఎంట్రీ ఇస్తున్నాడంటే అంచనాలు ఎలా ఉంటాయో వేరే చెప్పాలా. అలాంటి భారీ అంచనాలు, అంతకు మించిన ఒత్తిడి మధ్యే పూరీ జగన్నాథ్ డైరెక్షన్ లో చిరుతలా వచ్చాడు రామ్ చరణ్. రామ్ చరణ్ లాంచింగ్ లో పూరీ మరీ కథా కసరత్తులు చేయకుండా అతని కేపబిలిటీస్ ను ఎలివేట్ చేస్తూ.. చరణ్ టాలెంట్స్ ను ఆడియన్స్ కు తెలిసేలా చేశాడు. 'చిరుత' ఆశించినంత బిగ్గెస్ట్ హిట్ కాకపోయినా మెగాస్టార్ కు సరైన వారసుడుగా నిలిచే సత్తా ఉన్న వాడిగా చరణ్ ను ఫిక్స్ అయ్యారు మెగా ఫ్యాన్స్. వారి అంచనాలు ఏ మాత్రం తప్పు కాదని రెండో సినిమాకే ప్రూవ్ చేశాడు

ఎన్నో సినిమాలు చేసిన తర్వాత కానీ చిరంజీవికి 'ఖైదీ' వంటి పాత్ బ్రేకింగ్ మూవీ పడలేదు. కానీ రామ్ చరణ్ కు రెండో సినిమాకే ఆ బ్రేక్ వచ్చింది. రాజమౌళి డైరెక్షన్ లో వచ్చిన 'మగధీర'లో రామ్ చరణ్ ధీరత్వం గురించి ఎంత చెప్పుకున్నా తక్కువే. ఒక్కొక్కణ్నీ కాదు షేర్ ఖాన్.. వందమందినీ ఒకేసారి రమ్మను అంటూ ఆ లేత గొంతులో పలికిన డైలాగ్స్ కు వందల రికార్డ్స్ కనుమరుగయ్యాయంటే ఆశ్చర్యం ఏముందీ. 'మగధీర' తెలుగు సినిమాకు సంబంధించి సరికొత్త హిస్టరీ క్రియేట్ చేసిన సినిమా. కష్టం రాజమౌళిదే అయినా అతని నమ్మకాన్ని వెండితెరపై నిలబెట్టింది రామ్ చరణ్. హార్స్ రైడింగ్ నుంచి కత్తి ఫైట్ల వరకూ అతని శ్రమ వృథా పోలేదు. ఓ మాస్ హీరోకు కావాల్సిన అన్ని ఎలిమెంట్స్ నూ చూపించి తెలుగు సినిమాపై తనదైన జెండా ఎగురవేశాడు రామ్ చరణ్. 'మగధీర'లో అతని నటనకు ఫిల్మ్ ఫేర్ బెస్ట్ యాక్టర్ గా సత్కరించింది.

హిస్టారికల్ ఫిక్షన్ ఫిల్మ్ మగధీరతో సూపర్ హిట్ కొట్టిన రామ్ చరణ్, తర్వాత 'ఆరెంజ్'తో కంప్లీట్ లవ్ ఎంటర్టైనర్ చేశాడు. ఈసినిమా కోసం మేకోవర్ మొత్తం ఛేంజ్ చేసుకుని లవర్ బాయ్ లా మారిపోయాడు. మగధీర వంటి మాసివ్ హిట్ తర్వాత రావడం.. అప్పటికి కొత్త తరహా కథలకు తెలుగులో ఆదరణ లేకపోవడంతో ఫలితం తేడా కొట్టింది. 'ఆరెంజ్' ఫ్లాప్ తో మళ్లీ మాస్ జానర్ లో ఉండటమే సేఫ్ అన్న విషయం అర్థమైంది చరణ్ కి. అప్పటికి ఓ చిన్న సినిమా తీసిన సంపత్ నంది కథ నచ్చి చేసిన 'రచ్చ' బాక్సాఫీస్ వద్ద కమర్షియల్ గా సూపర్ హిట్ గా నిలిచింది. ఏ స్టార్ హీరో అయినా డ్యూయొల్ రోల్ చేయాలంటే కాస్త జంకుతారు. కానీ చరణ్ ఆ సాహసం చాలా తక్కువ టైమ్ లోనే చేశాడు. అప్పటి మాసివ్ డైరెక్టర్ వివి వినాయక్ తో 'నాయక్'లో రెండు పాత్రల్లో కనిపించి ఫ్యాన్స్ కు డబుల్ డోస్ ఇచ్చాడు. అంతకు ముందే చిరంజీవికి 'ఠాగూర్'తో ఆల్ టైమ్ హిట్ ఇచ్చిన వినాయక్, నాయక్ తో చెర్రీకి మెగా హిట్ ఇచ్చాడు. డ్యూయెల్ రోల్ లో చరణ్ కాన్ఫిడెన్స్ ప్రతి ఒక్కరికీ నచ్చేసింది.

సక్సెస్ ఎప్పుడూ కాన్ఫిడెన్స్ ను పెంచుతుంది. ఆ నమ్మకంలో ఒక్కోసారి అంచనాలు తప్పుతాయి. రామ్ చరణ్ విషయంలోనూ అదే జరిగింది. తక్కువ టైమ్ లోనే మాస్ హీరోగా ఎలివేట్ అయిన చరణ్ ను బాలీవుడ్ కు పంపాలన్న ఆలోచన ఎవరిదో గానీ.. అది ఓ బ్యాడ్ డెసిషన్ అని తెలియడానికి 'జంజీర్' వంటి డిజాస్టర్ చూడాల్సి వచ్చింది. బాలీవుడ్ మెగాస్టార్ చేసిన 'జంజీర్'కు రీమేక్ గా వచ్చిన ఈ సినిమా తెలుగులోనూ 'తుఫాన్'గా వచ్చింది. కానీ రెండు చోట్లా డిజాస్టర్. దీంతో ఇక ప్రయోగాలు చేయకూడదన్న విషయం తేలిపోయింది. అలాగే మళ్లీ తనదైన స్టైల్లో ఓ మాస్ సినిమా చేస్తే కానీ సెట్ కాదనుకున్నారు. అయితే మాస్ తో పాటు మరో ఎక్స్ పర్మెంట్ కూడా చేశాడు. అదే 'ఎవడు'. అల్లు అర్జున్ ఓకీలక పాత్రలో నటించిన ఈ సినిమాలో రామ్ చరణ్ అంతకు ముందు లేని విధంగా చాలా ఎగ్రెసివ్ గా కనిపిస్తాడు. వంశీ పైడిపల్లి డైరెక్షన్ లో వచ్చిన ఈ సినిమా కూడా సూపర్ హిట్ అయింది.

'ఎవడు' తర్వాత క్రియేటివ్ డైరెక్టర్ కృష్ణవంశీ రూపొందించిన 'గోవిందుడు అందరివాడేలే' సినిమాలో ఎన్.ఆర్.ఐ. గా అలరించిన చెర్రీ.. శ్రీనువైట్ల దర్శకత్వంలో 'బ్రూస్ లీ' సినిమాలోనూ వైవిధ్యభరిత పాత్రలో నటించాడు. కానీ.. సీనియర్ డైరెక్టర్స్ కృష్ణవంశీ, శ్రీను వైట్ల చెర్రీకి భారీ హిట్స్ అందించలేకపోయారు. 'బ్రూస్ లీ'కి బ్యాడ్ రివ్యూస్ వచ్చినా 40కోట్ల వరకూ వసూలు చేసి సత్తా చాటింది. ఒక రకంగా చూస్తే 'బ్రూస్ లీ' వరకూ రామ్ చరణ్ కెరీర్ లో కంటిన్యూస్ హిట్స్ లేవు. ఒక హిట్టు ఒక ఫ్లాపు అన్నట్టుగానే ఉంది. మరోవైపు పోటీ పెరుగుతోంది. అలాగే తెలుగులో కొత్త కథలకు ఆదరణ మొదలైంది. స్టార్ హీరోలు రొటీన్ మూస నుంచి బయటకు వస్తున్నారు. దీంతో రామ్ చరణ్ కూడా అదే చేశాడు. తమిళ్ లో సూపర్ హిట్ అయిన 'తనీ ఒరువన్'ను తెలుగులో 'ధృవ'గా రీమేక్ చేసి తనూ బ్లాక్ బస్టర్ కొట్టాడు. ఈ మూవీతో చరణ్ కెరీర్ కొత్త టర్న్ ఇచ్చుకుంది. అంటే తనూ ప్రయోగాలు చేయొచ్చు అనే నమ్మకాన్ని పెంచింది.

'ధృవ'తో రామ్ చరణ్ ను ఆడియన్స్ కూడా కొత్తగా చూశారు. అప్పటి వరకూ వచ్చిన చాలా విమర్శలకు ఈ సినిమా సమాధానం చెప్పింది. అదే అతన్ని రంగస్థలం వంటి ప్రయోగాత్మక సినిమాకు ప్రిపేర్ చేసింది. లేదంటే చరణ్ లాంటి స్టార్ హీరో చెవిటి యువకుడి పాత్రలో కనిపిస్తాడా.. ?అది కూడా పూర్తి స్థాయి గ్రామీణ యువకుడి పాత్ర. మొదట్లో ఈ సినిమా కథ గురించి లీకులు వచ్చినప్పుడు.. రకరకాలుగా అనుకున్నారు. కానీ ఒక్కో పాటతో అంచనాలు పెంచుకుంటూ వెళ్లాడు దర్శకుడు సుకుమార్. సినిమా రిలీజయ్యాక రామ్ చరణ్ పెర్ఫార్మెన్స్, సుకుమార్ టేకింగ్ తో 'రంగస్థలం' యునానిమస్ బ్లాక్ బస్టర్ టాక్ తో 200ల కోట్లకు పైగా కలెక్షన్లు కొల్లగొట్టి భారీ విజయాన్ని అందుకుంది. సిట్టిబాబుగా ఈ మూవీలో తన నటనతో ప్రతి ఒక్కరి చేతా కన్నీళ్లు పెట్టించాడు చరణ్. అన్ డౌటెడ్ లీ రంగస్థలంలో రామ్ చరణ్ చేసిన పాత్ర ప్రతి హీరో డ్రీమ్ రోల్. ఇలాంటి పాత్ర కెరీర్ లో ఒక్కసారైనా చేయాలని ప్రతి హీరో అనుకుంటాడు. చెల్లిబోయిన చిట్టిబాబు అనే పాత్రలో తనను తప్ప మరెవరినీ ఊహించుకునే ఛాన్స్ కూడా ఇవ్వలేదు. ఇక.. రంగస్థలం వంటి స్వీట్ హిట్ తర్వాత 'వినయవిధేయ రామ' వంటి చేదు గుళిక తిన్నాడు. అయినప్పటికీ రంగస్థలంతో వచ్చిన ఇమేజ్ మాత్రం చెక్కుచెదరలేదు.

'మగధీర' తర్వాత మళ్ళీ పదేళ్ళకు రాజమౌళితో సినిమా చేసే ఛాన్స్ వచ్చింది చరణ్ కి. అది కూడా మల్టిస్టారర్. ఎన్టీఆర్ మరో హీరోగా రామ్ చరణ్ చేసిన 'ఆర్.ఆర్.ఆర్' సినిమా తెలుగు ఇండస్ట్రీ స్థాయిని గ్లోబల్ లెవెల్ లో నిలబెట్టింది. ఈ సినిమాతో సరికొత్త గ్లోబల్ స్టార్ గా అవతరించాడు చరణ్. స్వాతంత్ర్య సమరయోధుడు అల్లూరి సీతారామరాజు పాత్రలో చరణ్ బెస్ట్ పెర్ఫార్మెన్స్ ఇచ్చి విమర్శకులు ప్రశంసలు అందుకుంటున్నాడు.

సందేశాత్మక కథాంశాలను వెండితెరపై అద్భుతంగా ఆవిష్కరించే దర్శకుడు శంకర్. భారీ బడ్జెట్ చిత్రాలకు కేరాఫ్ అడ్రస్ గా నిలిచే శంకర్‌ తో సినిమా చేయాలనేది చిరంజీవి చిరకాల కోరిక. శంకర్ తొలి చిత్రం 'జెంటిల్‌మేన్'ని.. చిరంజీవి హిందీలో 'ది జెంటిల్‌మేన్' పేరుతో రీమేక్ చేశాడు. కానీ.. శంకర్ తో సినిమా చేయాలన్న చిరు కోరిక మాత్రం నెరవేరలేదు. అయితే.. చిరంజీవి తనయుడు రామ్ చరణ్ కి ఆ అవకాశం లభించింది. కానీ భారీ అంచనాలతో వచ్చిన 'గేమ్ ఛేంజర్' డిజాస్టర్ గా మిగిలింది. ప్రస్తుతం రామ్ చరణ్ తన 16వ చిత్రాన్ని బుచ్చిబాబు దర్శకత్వంలో చేస్తున్నాడు. ఆ తర్వాత 17వ సినిమాని సుకుమార్ తో చేయబోతున్నాడు. ఈ రెండు చిత్రాలూ తనకు మళ్లీ గ్రేట్ కమ్ బ్యాక్ ఇస్తాయని నమ్ముతున్నాడు గ్లోబల్ స్టార్. మొత్తంగా.. రామ్ చరణ్ ఈ సినిమాలతో మరోసారి గ్లోబల్ లెవెల్ లో సత్తా చాటాలని కోరుకుంటూ రామ్ చరణ్ కి మరోసారి బర్త్‌డే విషెస్ చెబుదాం.

బాబురావు. కామళ్ల