Kangana Ranaut: 'తలైవి'కి అవార్డు రాకపోవడంపై నిరాశ వ్యక్తం చేసిన కంగనా
బాలీవుడ్ నటి కంగనా రనౌత్ 69వ జాతీయ అవార్డులలో 'తలైవి'కి ఏ అవార్డును గెలుచుకోలేకపోవడంపై నిరాశ వ్యక్తం చేసింది. ఇటీవల, జాతీయ చలనచిత్ర అవార్డులు 2023 విజేతలను న్యూ ఢిల్లీలో ప్రకటించారు. అలియా భట్, కృతి సనన్ ఉత్తమ నటి అవార్డును సొంతం చేసుకున్నారు. ఐకాన్ స్టార్ అల్లు అర్జున్ 'పుష్ప' సినిమాలో నటనకు గానూ ఉత్తమ నటుడిగా ఎంపికయ్యారు. ఈ నేపథ్యంలో కంగనా తన ఇన్‌స్టాగ్రామ్ స్టోరీస్‌లో ఓ ఇంట్రస్టింగ్ స్టోరీని షేర్ చేసింది. ఈసారి తన మూవీ అవార్డు గెలుచుకోకపోవడంపై అసంతృప్తిని వ్యక్తం చేసింది.
తన ఇన్‌స్టాగ్రామ్ స్టోరీ షేర్ చేసిన కంగనా.."#NationalAwards2023 విజేతలందరికీ అభినందనలు. ఇది దేశవ్యాప్తంగా ఉన్న కళాకారులందరినీ ఒకచోట చేర్చే ఆర్ట్ కార్నివాల్. అన్ని భాషల్లో రిలీజైన సినిమాలకు ఈ అవార్డులు ఇవ్వడమనేది చాలా ముఖ్యమైన, మంచి పని. ఇలా అందరినీ పరిచయం చేసుకోవడం నిజంగా అద్భుతం అని రాసుకొచ్చింది. దాంతో పాటు
తలైవి ఏమీ గెలవలేదని కంగనా చెబుతూ, "నా చిత్రం తలైవి ఏదీ గెలవలేదని నిరాశ చెందొద్దు.. మీరందరూ… కృష్ణుడు ఏది ఇచ్చినా నాకు, మీకు నిజంగా ఎప్పటికీ కృతజ్ఞులమేనని దయచేసి తెలుసుకోండి. నన్ను ప్రేమించండి. కళ అనేది ఆత్మాశ్రయమైనది. జ్యూరీ తమ వంతు కృషి చేసిందని నేను నిజంగా విశ్వసిస్తున్నాను.... అందరికీ శుభాకాంక్షలు.. హరే కృష్ణ" అని కంగనా తెలిపింది.
తలైవి గురించి..
తమిళనాడు దివంగత ముఖ్యమంత్రి జె. జయలలిత జీవిత చరిత్రపై కంగనా రనౌత్ సినిమా తెరకెక్కింది. కంగనా ఇందులో కథానాయికగా నటించగా.. నటుడు అరవింద్ స్వామి ఎంజీ రామచంద్రన్‌గా కనిపించారు. తమిళం, హిందీ, తెలుగు భాషల్లో ఏకకాలంలో రిలీజైన ఈ సినిమాకు AL విజయ్ దర్శకత్వం వహించారు. KV విజయేంద్ర ప్రసాద్, మధన్ కార్కీ (తమిళం), రజత్ అరోరా (హిందీ) రచించారు.
'తలైవి' జయలలిత జీవితంలోని విభిన్న కోణాలను ప్రదర్శించింది. చిన్న వయస్సులో నటిగా ఆమె ప్రయాణం ఎలా సాగింది, అలాగే రాష్ట్ర రాజకీయాల గమనాన్ని మార్చిన విప్లవ నాయకురాలి ఎదుగుదల ఎలా నడిచిందో ఈ మూవీ తెలియజేసింది.
కంగనా రనౌత్ సినిమాలు..
కంగనా రనౌత్ ప్రస్తుతం 'ఎమర్జెన్సీ'లో నటిస్తోంది. ఈ చిత్రంలో భారత మాజీ ప్రధాని ఇందిరా గాంధీ పాత్రలో కంగనా కనిపించనుంది. ఇది నవంబర్ 2023లో విడుదల కానుంది. ఇదే కాకుండా, లైకా ప్రొడక్షన్స్‌తో కంగనా రనౌత్ రాబోయే ప్రాజెక్ట్, 'చంద్రముఖి 2' ఇప్పటికే సోషల్ మీడియాలో సంచలనం సృష్టించింది. పి వాసు దర్శకత్వం వహించిన ఈ కామెడీ హారర్ సెప్టెంబర్ 19న వెండితెరపైకి రానుంది. ఫస్ట్ లుక్ పోస్టర్‌లో, కంగనా రనౌత్ అద్భుతమైన మెటల్ పొదిగిన పచ్చ చీరతో భారీ ఆభరణాలలో ఆకట్టుకుంది. ఇందులో రనౌత్, చంద్రముఖిగా, ఒక రాజభవనంలో స్ట్రాంగ్ గా కనిపించింది. ఇక ఈ సినిమాలో వడివేలు, సృష్టి డాంగే, లక్ష్మీ మీనన్ కూడా కీలక పాత్రల్లో నటిస్తున్నారు. 'చంద్రముఖి 2' హిందీ, తమిళం, తెలుగు, మలయాళం, కన్నడ భాషల్లో విడుదల కానుంది.
