KGF Real Story: కేజీఎఫ్.. కోలార్ గోల్డ్ ఫీల్డ్స్ రియల్ స్టోరీ ఏంటో తెలుసా!!

KGF Real Story: వాస్తవ కథకు కొంత నాటకీయతను జోడిస్తే అది సినిమా కథగా తెరకెక్కుతుంది. ప్రేక్షకులు అలాంటి చిత్రాలకు బ్రహ్మరథం పడతారనేదానికి నిదర్శనం కన్నడ సూపర్ స్టార్ యష్ నటించిన కేజీఎఫ్. దీనికి సీక్వెల్ కేజీఎఫ్ చాప్టర్ 2 గురించే ప్రస్తుత చర్చ. ఏప్రిల్ 14న విడుదల కానున్న ఈ చిత్రం కోసం యావత్ భారత సినీ ప్రేమికులు ఎదురు చూస్తున్నారు.

ప్రశాంత్ నీల్ దర్శకత్వంలో తెరకెక్కిన ఈ 'కేజీఎఫ్' రియల్ స్టోరీ ఏంటో తెలుసుకుందాం. 'కేజీఎఫ్ 2'కి ముందు గోల్డ్ స్వియింగ్ మైన్స్ అని కూడా పిలువబడే అసలు కోలార్ గోల్డ్ ఫీల్డ్స్ కథ ఎక్కడిదో చూద్ధాం.

1. KGF అంటే కోలార్ గోల్డ్ ఫీల్డ్. కర్ణాటక రాష్ట్రంలోని కోలార్ జిల్లాలో ఒక మైనింగ్ ప్రాంతం. ఈ ప్రదేశం బ్రిటీష్ కాలంలో బంగారం ఉత్పత్తికి ప్రసిద్ధి చెందింది.

2. కోలార్ ప్రపంచంలోనే రెండవ లోతైన గని. దాదాపు 121 సంవత్సరాల పాటు ఇక్కడ బంగారం కోసం తవ్వకాలు జరిగినట్లు చరిత్ర చెబుతోంది. మీడియా కథనాల ప్రకారం, కోలార్ నుండి మొత్తం 900 టన్నులకు పైగా బంగారం వెలికితీసినట్లు తెలుస్తోంది.

3. బెంగుళూరు నుండి 100 కిలోల దూరంలో ఉన్న కోలార్ బంగారం ఉత్పత్తికి ప్రసిద్ధి చెందింది. 1905లో ప్రపంచంలోనే అత్యధిక బంగారాన్ని ఉత్పత్తి చేసే దేశాల్లో భారతదేశం 6వ స్థానంలో ఉంది.

4. బ్రిటిష్ వారు దీనిని మినీ ఇంగ్లాండ్ అని పిలిచేవారు.

5. జపాన్ తర్వాత విద్యుత్‌ను ప్రవేశపెట్టిన ఆసియాలో రెండవ నగరం KGF.

6. ఈ గనిని మళ్లీ తెరవడానికి ప్రధాని మోడీ ప్రభుత్వం సన్నాహాలు చేస్తున్నట్లు తెలుస్తోంది. నేటికీ కోలారులో చాలా బంగారం ఉందని చెబుతారు.

7. కేజిఎఫ్‌లోని భారత్ గోల్డ్ మైన్స్ లిమిటెడ్‌లో వేల మంది పని చేసేవారు. 2001లో ప్రభుత్వ సంస్థ తవ్వకాలను నిలిపివేసింది. దీనికి కారణం బంగారం ఉత్పత్తి తగ్గడం, తవ్విన ఖర్చు ఎక్కువ కావడం ప్రారంభించింది. దాంతో బంగారం తవ్వకాలు నిలిపివేశారు.

8. కేజిఎఫ్ నుండి 131 కిమీ దూరంలోని శివనసముద్రంలో ఆసియాలో మొట్టమొదటి జల విద్యుత్ కేంద్రం స్థాపించబడింది.

9. కర్ణాటకను పాలించిన గుప్త, చోళ రాజవంశాలు, టిప్పు సుల్తాన్ ఆంగ్లేయులతో అలుపెరుగని పోరాటం చేశారు కోలార్ గనులను వారి వద్దనుంచి స్వాధీనం చేసుకోవడానికి. ఆంగ్లేయులతో జరిపిన పోరాటంలో టిప్పు ప్రాణాలు కోల్పోయాడు.

10. 1903లో, బ్రిటీష్ ప్రభుత్వం KGF మరియు చుట్టుపక్కల గ్రామాలకు నీటిని సరఫరా చేయడానికి బేట్మంగళ వద్ద ఒక సరస్సును నిర్మించింది. ఈ కృత్రిమ సరస్సు క్రమంగా పిక్నిక్ స్పాట్‌గా మారింది.

11. బ్రిటీష్ గవర్నర్ జాన్ వారెన్ కోలార్ మట్టిలో బంగారం ఉన్నట్లు తెలుసుకున్నాడు. ఇదే విషయాన్ని ఆయన ఓ పుస్తకంలో రాసుకొచ్చారు. అయితే ఎక్కువ మొత్తంలో గనుల తవ్వకం చేపడితే తక్కువ బంగారం దొరుకుతుందని తెలుసుకుని ఇది వృధా ప్రయత్నం అని గనుల తవ్వకాన్ని విరమించుకున్నాడు.

12. బంగారం తవ్వకాలు చేపట్టేందుకుగాను దాదాపు 30 వేల మంది కార్మికులు పనిచేసేవారు. ఏళ్లు గడిచే కొద్దీ బంగారం గనులు అంతరించిపోవడంతో 2001 నుంచి తవ్వకాలను నిలిపివేశారు.

ఈ పాయింట్ ని బేస్ చేసుకుని ప్రశాంత్ నీల్ కేజీఎఫ్ ని తెరకెక్కించారు. ఈ కథ, కథనం ప్రేక్షకులను ఆకర్షించింది. బంగారం గనుల ప్రాంతాన్ని దక్కించుకోవడం కోసం పలువు వ్యక్తుల మధ్య జరిగిన పోరాటం, అందులో పని చేసే కార్మికుల చీకటి జీవితాలను కళ్లకు కట్టినట్లు చిత్రీకరించారు దర్శకుడు.

అప్పటి నుంచి కేజీఎఫ్ గురించి చర్చలు ప్రారంభమయ్యాయి. అయితే దర్శకుడు ప్రశాంత్ నీల్ కేజీఎఫ్ కల్పిత కథ అని వివరణ ఇచ్చుకున్నారు.