Yogi Rerelease : బ్లేడ్‌తో స్క్రీన్ కట్ చేసిన ప్రభాస్ ఫ్యాన్స్!
ప్రస్తుతం టాలీవుడ్ లో తెలుగు సినిమాల రీరిలీజ్ ట్రెండ్ ఊపందుకుంది. ఈ చిత్రాలను కొత్త అవతార్‌లో ప్రేక్షకుల ముందుకు తీసుకురావడమే ఈ వ్యూహం లక్ష్యం. 'పోకిరి', 'బిజినెస్ మేన్', 'ఒక్కడు', 'సింహాద్రి', 'ఖుషి', 'జల్సా', 'ఆరెంజ్', 'దేశముదురు', 'బిల్లా' వంటి చిత్రాలు ఇప్పటికే రీరిలీజ్‌ల ద్వారా ప్రేక్షకులను కట్టిపడేశాయి. అదే తరహాలో ప్రభాస్ 'యోగి', ధనుష్ 'రఘువరన్ బి.టెక్' సినిమాలు కూడా ఈ వారం థియేటర్లలోకి వచ్చాయి.
ఈ రీ-రిలీజ్‌ల సమయంలో అభిమానులు తీవ్ర ఉత్సాహాన్ని ప్రదర్శించారు. మామూలుగా తమ అభిమాన హీరో సినిమా రిలీజ్ అవుతుందంటే.. గాలిలో విసిరేందుకు థియేటర్లకు కాగితాల బస్తాలను తీసుకువస్తారు. కుర్చీలపై ఎక్కి పాటలకు డ్యాన్స్ చేసేందుకు అత్యంత ఉత్సాహంగా ఉండడం సర్వసాధారణం. అయితే కొంతమంది అభిమానులు మాత్రం థియేటర్‌లో బాణాసంచా కాలుస్తూ బాధ్యతా క్రమరాహిత్యానికి దారితీసే ఘటనలు కూడా చోటుచేసుకోవడం చూస్తూనే ఉంటాం.
ఇటీవల జరిగిన ఓ ఘటన కూడా అదే కోవకు చెందిందే. 'యోగి' సినిమా రీ-రిలీజ్ సందర్భంగా ప్రభాస్ అభిమానులు గందరగోళం సృష్టించారు. హైదరాబాదులోని సుదర్శన్ థియేటర్‌లోని స్క్రీనింగ్ సమయంలో సినిమా ఆకస్మికంగా ఆగిపోవడంతో వారు బ్లేడుతో స్క్రీన్‌ను ధ్వంసం చేశారు. కొంతమంది అభిమానులు అద్దాలు పగలగొట్టడం, సీసాలు విసిరేయడం, థియేటర్ మౌలిక సదుపాయాలకు నష్టం కలిగించడం వంటి విధ్వంసక ప్రవర్తనకు పాల్పడ్డారు. ఈ నేపథ్యంలో
థియేటర్ యాజమాన్యం పోలీసు అధికారులను ఆశ్రయించగా, వారు కొంతమంది అభిమానులపై ఫిర్యాదు నమోదు చేసి, విచారణ జరుపుతున్నట్టు తెలుస్తోంది.
