Actor Suhas : మండాడి నుంచి సుహాస్ సూపర్ లుక్

ఆర్ఎస్ ఇన్ఫోటైన్మెంట్ బ్యానర్ లో రూపొందుతోన్న చిత్రం ‘మందాడి’. స్పోర్ట్స్ బ్యాక్ డ్రాప్ లో సాగే యాక్షన్ డ్రామాగా ఈ చిత్రం ఉండబోతోందని చెబున్నారు. సెల్ఫీ అనే చిత్రంతో మెప్పించిన మతిమారన్ పుగళేంది ఈ చిత్రాన్ని డైరెక్ట్ చేస్తున్నాడు. ప్రధాన పాత్రగా సూరి నటిస్తుండగా.. తెలుగు నుంచి టాలెంటెడ్ యాక్టర్ సుహాస్ మరో కీలక పాత్రలో కనిపించబోతున్నాడు. ఇది అతనికి తొలి తమిళ చిత్రం కావడం విశేషం. మహిమా నంబియార్ హీరోయిన్. అన్ని భాషల ప్రేక్షకులను ఆకట్టుకునేలా చిత్రాన్ని మలుస్తున్నారు.

రీసెంట్ గా మందాడి నుంచి సూరి ఫస్ట్ లుక్ పోస్టర్ ను విడుదల చేశారు. తాజాగా సుహాస్ ఫస్ట్ లుక్ పోస్టర్ రిలీజ్ చేశారు. లుంగీ ధరించి, నెరిసిన జుట్టుతో, జెర్సీ వేసుకుని "సునామీ రైడర్స్" బృందంతో సముద్రతీరంలో నిలిచిన సుహాస్ లుక్ అభిమానులను ఆకట్టుకుంటోంది. మరో పోస్టర్‌లో సూరి, సుహాస్ ఇద్దరూ స్వయంగా పడవలు నడుపుతూ ఒకరికి ఒకరు వ్యతిరేకంగా కనిపించడం సినిమాలో వారి మధ్య జరిగే గట్టి పోరును సూచిస్తోంది. సుహాస్ ఈ చిత్రంలో బలమైన ప్రతినాయకుడిగా కనిపించనున్నాడు.

ఈ చిత్రంలో సత్యరాజ్, రవీంద్ర విజయ్, అచ్యుత్ కుమార్ వంటి అద్భుత నటులు కూడా కీలక పాత్రల్లో కనిపించనున్నారు. క్రీడా నేపథ్యాన్ని ఆధారంగా చేసుకుని, బలమైన భావోద్వేగాలు, సంకర్షణలతో కూడిన ఈ సినిమా జీవన పోరాటం, వ్యక్తిత్వం, ఆత్మవిశ్వాసాన్ని ప్రతిబింబించే కథ అని చెబుతున్నారు.