Nag Ashwin Champion : కల్కి బ్యానర్ నుంచి ఛాంపియన్ వస్తున్నాడు

వైజయంతీ మూవీస్ బ్యానర్ గురించి తెలియని తెలుగు ఫిల్మ్ లవర్ ఉండడు. అలాంటి బ్యానర్ ఆర్థిక ఇబ్బందుల్లో ఉంటే నిర్మాత అశ్వనీదత్ కూతురుళ్లు స్వప్న సినిమాస్ అనే బ్యానర్ పెట్టి చిన్న సినిమాలతో పెద్ద విజయాలు సాధించారు. నాగ్ అశ్విన్ ఆ ఇంటి అల్లుడు కూడా అయిన తర్వాత చేసిన ఎవడే సుబ్రహ్మణ్యం, మహానటి సినిమాలు ఆ బ్యానర్ స్థాయిని కూడా పెంచాయి. వైజయంతీలో మరోసారి కల్కి రూపంలో భారీ విజయం అందుకున్న ఈ టీమ్ నుంచి ఇప్పుడు మరో సినిమా రాబోతోంది. అయితే ఇది భారీ చిత్రం కాదు. మీడియం రేంజ్ మూవీ. శ్రీకాంత్ తనయుడు రోషన్ హీరోగా నటించబోతున్నాడు.

సేవ్ ద టైగర్స్ అనే వెబ్ సిరీస్ రైటర్ గా బాగా ఫేమ్ అయిన ప్రదీప్ అద్వైతం ఈ చిత్రాన్ని డైరెక్ట్ చేయబోతున్నాడు. అతను ఆల్రెడీ షార్ట్ ఫిలిమ్స్ తో దర్శకుడుగా సత్తా చాటి ఉన్నాడు. కామెడీతో పాటు ఎమోషన్ ను కూడా బాగా రాయగలడు. ప్రదీప్ డైరెక్ట్ చేయబోతోన్న ఈ చిత్రానికి ‘ ఛాంపియన్ ’ అనే టైటిల్ ఫిక్స్ చేశారు. టైటిల్ కు తగ్గట్టుగానే ఇది స్పోర్ట్స్ బ్యాక్ డ్రాప్ లో సాగే కథట. తాజాగా నాగ్ అశ్విన్ క్లాప్ ఇన్ తో స్టార్ట్ అయింది. త్వరలోనే ఈ మూవీ ఇతర కాస్ట్ అండ్ క్రూకు సంబంధించిన అప్డేట్స్ రాబోతున్నాయి. ఈ చిత్ర నిర్మాణంలో స్వప్న సినిమాస్ తో పాటు కాన్సెప్ట్ స్టూడియోస్, ఆనంది ఆర్ట్స్ బ్యానర్స్ కూడా భాగస్వామిగా ఉన్నాయి.