Tollywood : ప్రయోగాలకు చిరునామా ఆది సాయికుమార్
నటుడు ఆది సినీ ఇండస్ట్రీకి వచ్చి పన్నెండేళ్లు పూర్తవుతోంది. ప్రయోగాలకు కేరాఫ్ గా మారిన ఆయన.. లవ్లీ స్టార్ గా అలరిస్తున్నారు. సినిమా ప్రపంచంలో హీరోలు సక్సెస్ అవ్వడం ఒకెత్తు అయితే.. ఆ సక్సెస్‌ను కాపాడుకోవడం మరోకెత్తు. అభిమానుల అంచనాలు అందుకుంటూ నిర్మాతలకు లాభాలు తెచ్చి పెట్టే హీరోగా నిలదొక్కుకోవడం ఎంతో కష్టం. అయితే టాలీవుడ్‌కు సాయి కుమార్ కు వారసత్వ హీరోగా ఆది ఎంట్రీ ఇచ్చాడు. ప్రేమ కావాలి సినిమాతో హీరోగా పరిచయం అయ్యారు. తనకంటూ నటుడిగా ఓ ప్రత్యేక ముద్రను వేశారు.
ఈ పుష్కర కాలంలో ఆది ఎన్నెన్నో ప్రయోగాలు చేశారు. ఫలితంతో సంబంధం లేకుండా తన అభిమానులను అలరించేందుకు విభిన్న జానర్లను ప్రయత్నించాడు. ఆది కెరీర్‌లో ప్రేమ కావాలి, లవ్లీ, సుకుమారుడు, శమంతకమణి, ఆపరేషన్ గోల్డ్ ఫిష్, బుర్రకథ, శశి ఇలా అనేక రకాల కాన్సెప్టులతో సినిమాలు చేసి ప్రేక్షకులను మెప్పించారు. గత ఏడాది ఐదు సినిమాలతో అభిమానుల ముందుకు వచ్చాడు. తీస్ మార్ ఖాన్, క్రేజీ ఫెల్లో,బ్లాక్ అతిథి దేవో భవ, టాప్ గేర్ అంటూ ఇలా వరుసగా ప్రేక్షకుల ముందుకు వచ్చాడు. చివరగా వచ్చిన 'టాప్ గేర్' సినిమాకు కూడా మంచి రెస్పాన్స్ వచ్చింది.
ఇప్పుడు ఆది ఓటీటీలోనూ ఎంట్రీ ఇచ్చారు. 'పులి మేక' అనే వెబ్ సిరీస్‌లో ఆది నటించాడు. ప్రస్తుతం ఈ పులి మేక వెబ్ సిరీస్‌ జీ5లో ట్రెండ్ అవుతోంది. ఫోరెన్సిక్ టీమ్ హెడ్ ప్రభాకర్ శర్మ పాత్రలో ఆది కనిపించిన తీరు, నటించిన సీన్ల గురించి అంతా చర్చించుకుంటున్నారు. ఓ వైపు సినిమాలతో బిజీగా ఉన్నా కూడా ఇలా ఓటీటీలోనూ నటించి ఇప్పుడు ట్రెండింగ్‌లోకి వచ్చారు.