VIJAY: నటుడు తలుచుకుంటే చరిత్రను తిరగరాయగలడు
తమిళనాడు రాజకీయాల్లో అరుదైన మార్పులకు నాంది పలికేలా సినీనటుడు నుంచి నాయకుడిగా ఎదిగిన విజయ్ అద్భుత విజయాన్ని నమోదు చేయడం దేశవ్యాప్తంగా చర్చనీయాంశమైంది. తొలిసారి ఎన్నికల బరిలోకి దిగిన ఆయన పార్టీ టీవీకే భారీ స్థాయిలో స్థానాలను కైవసం చేసుకుని అక్కడి రాజకీయ సమీకరణాలను పూర్తిగా మార్చేసింది. ఈ అనూహ్య విజయంతో విజయ్కు అన్ని వర్గాల నుంచి, ముఖ్యంగా సినీ పరిశ్రమ నుంచి అభినందనలు వెల్లువెత్తుతున్నాయి. తెలుగు సినీ ప్రముఖులు ఈ విజయంపై ప్రత్యేకంగా స్పందించారు. చిరంజీవి సోషల్ మీడియా వేదికగా స్పందిస్తూ, తొలి ఎన్నికల్లోనే ఇంతటి ఘనవిజయం సాధించడం గొప్ప విషయమని పేర్కొన్నారు. ప్రజలు చూపిన విశ్వాసాన్ని నిలబెట్టే నాయకత్వం విజయ్ అందిస్తారని ఆశాభావం వ్యక్తం చేశారు. అదే విధంగా మహేశ్ బాబు కూడా స్పందిస్తూ, ఈ ఎన్నికల ఫలితాలు ప్రజల నమ్మకానికి ప్రతిబింబమని అన్నారు. ఈ విజయం తమిళనాడులో అర్థవంతమైన అభివృద్ధికి దారి తీస్తుందని తాను విశ్వసిస్తున్నట్లు తెలిపారు.
జన నాయగణ్ సినిమాపై...
విజయ్ చివరి చిత్రంగా చెప్పబడుతున్న జన నాయగన్ నిర్మాత వెంకట్ కే నారాయణ కూడా సోషల్ మీడియాలో అభినందనలు తెలియజేశారు. ఎన్నో అడ్డంకులను దాటి విజయ్ చారిత్రక విజయం సాధించారని పేర్కొన్నారు. ఈ సందర్భంగా సినిమా పోస్టర్ను పంచుకోవడం అభిమానుల్లో ఉత్సాహాన్ని పెంచింది. నటుడు నాని తన అభిప్రాయాన్ని వ్యక్తం చేస్తూ, సాధారణ నేపథ్యం నుంచి వచ్చిన వ్యక్తి ఈ స్థాయి విజయాన్ని సాధించడం నిజంగా సినిమాను తలపించే సంఘటన అని వ్యాఖ్యానించారు. ప్రజలు తమ నిర్ణయాన్ని స్పష్టంగా తెలియజేశారని, భవిష్యత్తులో మంచి ఫలితాలు రావాలని ఆశించారు. ఇక వెంకటేశ్, రవితేజ, రామ్ చరణ్, విజయ్ దేవరకొండ, రష్మిక మందన్న తదితరులు కూడా సోషల్ మీడియా ద్వారా విజయ్కు శుభాకాంక్షలు తెలియజేశారు. ఈ విజయం సినీ ప్రపంచం నుంచి రాజకీయాల్లోకి వచ్చిన వ్యక్తుల ప్రభావాన్ని మరోసారి గుర్తుచేసిందనే అభిప్రాయం వ్యక్తమవుతోంది.
ఈ సందర్భంగా నందమూరి బాలకృష్ణ కూడా స్పందించారు. గతంలో తమిళనాడులో ఎంజీఆర్, తెలుగులో నందమూరి తారక రామారావు చరిత్రను మార్చినట్లే, ఇప్పుడు విజయ్ కూడా అదే తరహా ప్రభంజనం సృష్టించారని ఆయన అభిప్రాయపడ్డారు. ఒక నటుడు తన సంకల్పంతో సమాజాన్ని ప్రభావితం చేయగలడని మరోసారి నిరూపితమైందని పేర్కొన్నారు. విజయ్ విజయంతో ఆయన చివరి సినిమా ‘జన నాయగన్’ మళ్లీ వార్తల్లోకి వచ్చింది. ఈ చిత్రాన్ని హెచ్ వినోద్ దర్శకత్వం వహించగా, కేవీఎన్ ప్రొడక్షన్ నిర్మించింది. . సినిమా విడుదలపై ఇప్పటికే ఆసక్తి నెలకొన్న సమయంలో, ఈ రాజకీయ విజయం మరింత హైప్ తీసుకొచ్చింది. అభిమానులు సినిమా టైటిల్ కార్డులో మార్పులు చేయాలని కూడా కోరుతున్నారు. ‘దళపతి విజయ్’ అనే స్థానంలో ‘సీఎం దళపతి విజయ్’ అని చూపించాలని సోషల్ మీడియాలో డిమాండ్ చేస్తున్నారు. ఈ చిత్రం విడుదల విషయంలో ఇంకా స్పష్టత రాలేదు. మొదట జనవరిలో విడుదల చేయాలని భావించినప్పటికీ, సెన్సార్ ప్రక్రియలో జాప్యం కారణంగా వాయిదా పడింది. ప్రస్తుతం చిత్రం సీబీఎఫ్సీ రివైజింగ్ కమిటీ వద్ద ఉండగా, వారి నివేదిక తర్వాత విడుదల తేదీ ఖరారయ్యే అవకాశం ఉంది. ఈ నెలలో విడుదల చేయవచ్చన్న ప్రచారం జరుగుతోంది. మొత్తంగా చూస్తే, విజయ్ సాధించిన ఈ రాజకీయ విజయం కేవలం ఒక ఎన్నికల ఫలితం మాత్రమే కాకుండా, ప్రజల ఆలోచనల్లో వచ్చిన మార్పుకు సంకేతంగా భావిస్తున్నారు. సినీ ప్రపంచంలో సంపాదించిన ప్రజాదరణను రాజకీయాల్లోకి మలచుకుని విజయ్ సాధించిన ఈ ఘనత, భవిష్యత్తులో మరిన్ని మార్పులకు దారి తీసే అవకాశాలు ఉన్నాయని విశ్లేషకులు అభిప్రాయపడుతున్నారు.